Ниту новата верзија на предлог ДУП-от не претставува суштинско решавање на проблеми е ставот на граѓаните на Лисиче откако Општина Аеродром го објави коригираниот план за оваа населба, кој од понеделник ќе се најде на јавна анкета.

 Општина Аеродром излезе со нова верзија за предлог ДУП-от за Градска четврт ЈИ О9 01 што се однесува на населба Лисиче. Како што можете да видите спорните згради и улици остануваат иако дел се отстранети! Оваа верзија на предлог ДУП-от не претставува суштинско решавање на нашите проблеми, туку обид за мачкање на очи на нас жителите и на јавноста. Ние ќе продолжиме да се бориме и против оваа верзија на планираниот предлог ДУП, и јасно остануваме на нашиот принцип дека нема место за згради во Лисиче – велат од иницијативата „Да го зачуваме Лисиче“.

Во новиот предлог ДУП, за кој од Општината тврдат дека е направен согласно забелешките кои граѓаните ги дале во анкетните листови во текот на првата јавна анкета, не се вцртани девет згради, туку три, но од нив сега дури две се на 12 ката, поточно предвидено е да имаат приземје, десет ката и поткровје.