Поранешната министерка за правда на Украина, Олга Стефанишина, официјално стана амбасадорка на земјата во Соединетите Американски Држави, објави денес украинскиот лидер Володимир Зеленски.

„Тукушто разговарав со Олга Стефанишина, која сега е новата амбасадорка на Украина во САД. Формалните процедури се завршени – денес го потпишав указот за назначување на амбасадорот“, рече Зеленски во вечерното видео обраќање.

Тој изјави дека ги идентификувал клучните задачи за реорганизација на работата на украинската амбасада во САД и спроведувањето на сите договори со американскиот претседател Доналд Трамп, првенствено во одбранбениот сектор, објавува РБК Украина.

„Во многу аспекти, долгорочната безбедност на Украина зависи од нејзините односи со САД“, рече Зеленски. Тој потсети дека во моментов се разгледуваат два силни украински предлози за САД, имено договори за оружје за Украина и договор за современи беспилотни летала за САД.

„Киев смета на брз развој на односите со Вашингтон“, нагласи украинскиот лидер.

Тој особено ѝ се заблагодари на поранешната амбасадорка во САД, Оксана Маркарова, која ја претставуваше Украина во Вашингтон во текот на годините од почетокот на големата војна.

„Веќе разговаравме за понатамошна соработка и ја замолив Оксана Маркарова да остане во тимот и да продолжи да работи за Украина“, рече тој.

Во 2020 година, Олга Стефанишина беше назначена за вицепремиер за европска интеграција на Украина, а од 5 септември 2024 година до 17 јули 2025 година, таа беше вицепремиер за европска и евроатлантска интеграција на Украина и министер за правда на Украина. На 17 јули, Зеленски ја назначи Олга Стефанишина за специјален претставник за развој на соработката со Соединетите Американски Држави. Таа требаше да остане на оваа позиција додека траат процедурите за одобрување на нејзината кандидатура за позицијата амбасадор на Украина во Вашингтон.