Новинарот Адријан Керими, кој со години го следи случајот со осудените за убиството на полициските „Алфи“ кај ПМФ, во вечерашното издание на емисијата „Патот кон“ на Алсат рече дека членовите на семејството на осудениот Реџаил Ќерими, кој почина минатата недела, се сомневаат оти неговата здравствена состојба е влошена „како резултат на направената неправда“.

Според новинарот, во иста здравствена состојба се и другите осудени лица во овој случај.

„Разговарав со семејството на Реџаил и разговарам секој ден. Нивниот сомнеж е дека состојбата на Реџаил се влошила поради неправдата што му била направена. А, во ништо подобра здравствена состојба не се и останатите осудени за овој случај. Затоа го вклучивме овој аларм во медиумите, во институциите, во јавноста за што поскоро да се преземат чекори за тоа да не се повтори. Затоа што одиме по истиот пат. Оставаме луѓе во затвор, страдаат и умираат поради немање институционална и политичка волја за решавање на случајот“, вели Керими.

На 29 ноември 2008 година, тричлена полициска патрола беше нападната на паркингот на Природно-математичкиот факултет во Скопје. Полицаецот Африм Латифи загина на местото, додека двајцата други полицајци беа изрешетани, а еден од нив е доживотен инвалид од раните здобиени во заседата. Покрај Ислами и Ќерими, кои се осудени на доживотен затвор, за нападот како главен организатор е осуден Алмир Дрпљанин. Тој во бегство беше осуден на доживотна казна, но по апсењето на Косово и екстрадицијата, на ново судење за крвавиот напад доби 20 години затвор.