Американскиот пратеник Стив Виткоф и рускиот претседател Владимир Путин денеска се сретнаа во Кремљ, во сенка на ултиматумот на Доналд Трамп до Москва да се согласи на прекин на огнот во Украина.

Советникот за надворешна политика на Кремљ, Јуриј Ушаков, кој беше присутен на состанокот, рече дека „добивме некои сигнали од Трамп, испративме и некои“. Рускиот функционер зборуваше за „корисна и конструктивна средба меѓу претседателот Путин и американскиот специјален пратеник“.

Разговорите траеле три часа, според руските медиуми, откако авионот на Витков слета во Русија рано во среда. Беше разговарано за украинската криза и перспективите за можен развој на стратешка соработка меѓу САД и Русија.

Американскиот претседател предупреди дека Русија би можела да се соочи со строги санкции или да види воведување на секундарни санкции врз сите што тргуваат со неа доколку не преземе мерки за да ја заврши својата „ужасна војна“ со Украина.

Украинскиот претседател Володимир Зеленски изјави дека Русија ќе биде принудена да преземе сериозни чекори кон мир само ако почне да останува без пари. Тој ја поздрави заканата од построги санкции и царини од САД за земјите што купуваат руска нафта.

На снимките што ги споделија руските медиуми, двајцата мажи – кои се сретнале неколку пати претходно – се гледаат како се смешкаат и се ракуваат во позлатена сала.

Очекувањата за решавање на конфликтот до петок се мали, бидејќи Русија продолжува со своите големи воздушни напади во Украина и покрај заканите на Трамп за санкции.

Пред да ја преземе функцијата во јануари, Трамп тврдеше дека може да ја заврши војната меѓу Русија и Украина за еден ден. Тој не успеа, а оттогаш се чини нетрпелив поради недостатокот на опиплив напредок, со заострување на неговата реторика кон Русија, коментира Би-Би-Си.

„Мислевме дека [војната] е решена многу пати, а потоа претседателот Путин излезе и почна да испукува ракети кон некој град како Киев и уби многу луѓе во дом за стари лица или што и да е“, рече тој минатиот месец.

Три рунди разговори меѓу Украина и Русија во Истанбул не успеаја да ја доближат војната до крај, три и пол години откако Москва ја започна својата тотална инвазија.

Воените и политичките услови на Москва за мир остануваат неприфатливи за Киев и неговите западни партнери. Кремљ, исто така, постојано ги отфрла барањата на Киев за средба меѓу Зеленски и Путин.

Во меѓувреме, американската влада во вторник одобри дополнителни 200 милиони долари воена продажба на Украина по телефонскиот разговор меѓу Зеленски и Трамп, во кој двајцата лидери разговараа и за одбранбената соработка и производството на беспилотни летала.

Украина користи беспилотни летала за да ги напаѓа руските рафинерии и енергетски постројки, додека Москва ги фокусира своите воздушни напади врз украинските градови.

Воената команда на градот Киев соопшти дека бројот на жртви од нападот врз градот минатата недела се искачил на 32, откако еден човек почина од повредите. Нападот беше најсмртоносниот во Киев од почетокот на инвазијата.

Украинските власти во среда објавија дека во руски напад врз камп во регионот Запорожје загинале двајца, а 12 биле повредени.

„Нема воена логика во овој напад. Тоа е само суровост да се исплашат луѓето“, рече Зеленски.

ВИДЕО | Американскиот специјален пратеник Виткоф пристигна во Москва кратко пред истекот на ултиматумот на Трамп