Завршија градежните работи на улицата Даме Груев од раскрсницата со улица Димитрие Чуповски до раскрсница со улицата 11 Октомври, реконструкција која се одвиваше во две фази. Оваа сообраќајница во централното градско подрачје беше во лоша состојба и континуирано беше посочувана од жителите коишто ја користат како опасна за учесниците во сообраќајот.

Со реконструкцијата на оваа фреквентна и значајна сообраќајница за граѓаните на Скопје, особено за жителите на Центар и за оние што секојдневно го возат овој потег, се зголемува безбедноста на сите учесници во сообраќајот, што е еден од приоритетите на Градот – изјави градоначалничката Данела Арсовска.

Во текот на градежните работи, што на терен ги извршуваше градското јавно претпријатие „Улици и патишта“ освен коловозотот, беа реконструирани пешачки патеки, нивелирани шахтите и сливниците и подигнато ново градско зеленило на крстосницата со улицата Димитрие Чуповски.

Од Град Скопје информираат дека работат на сообраќајно решение за непрекината велосипедска патека и дополнително уредување на зеленилото по должината на целата сообраќајница, како и на трансформација на дел од трасата во нова зелена површина. Оттаму додаваат дека продолжуваат градежните активности за обнова на повеќе градски булевари и улици на повеќе локации низ сите скопски општини.