Заврши јавниот повик за доставување на предлог-идејни решенија за изградба на една нова и доградба на постоечка градинка во Општина Аеродром, информираат од локалната самоуправа од каде што објаснуваат дека, до комисијата формирана во рамките на општината пристигнаа 37 идејни решенија за изгледот и функционалноста на детските градинки.

– Комисијата која е составена од докажани професионалци во оваа област треба најдоцна во рок од десет дена од завршувањето на јавниот повик да ги избере најдобрите решенија на конкурсот, кои потоа ќе бидат јавно презентирани пред јавноста. При целиот избор на идејното решение, најпрво се води грижа на квалитетот на материјалите за градба, водејќи сметка на енергетската ефикасност, противпожарната заштита и лесната пристапност. Потоа при планирање на објектите се посветува внимание истите да бидат во согласност со актуелните потреби за сместување на дечиња утврдени од страна на општинските служби – стои во објавата на Општина Аеродром.

Како што велат од локалната самоуправа а согласно динамиката планирано е во првата половина од 2023 година да започне изградбата на едната градинка и доградбата на втората со што ќе се реши проблемот за сместување на околу 600 дечиња од Општина Аеродром.