Жените во Северна Кореја кои се наоѓаат во затворски кампови се изложени на мачење, силување, и други форми на „повеќекратно и сериозно насилство од страна на чувари и полицајци, стои во извештајот за човекови права кој денеска го објави ОН.

Извештајот наречен „Се уште чувствувам болка“ содржи сведоштва на повеќе од 100 жени кои се затворени во периодот од 2009 до 2019 година, откако не успеале да ја напуштат земјата, пишува Ројтерс. Интервјуата се направени по нивното пуштање и бегство во Јужна Кореја, а во нив се наоѓаа сведоштва за ускратување на храна, сон, дневна светлина и свеж воздух во затворите и логорите.

Многу интервјуирани жени рекоа дека биле мачени, присилувани на абортус и силувани. Сите жени на крајот успеале да побегнат во Јужна Кореја.

„Не спиев ниту работев зошто не сакав да ме тепаат. Беше мачно до таа мерка што дури се обидов и да се самоубијам“, рече една жена. Друга се присети како една од првите ноќи во затворскиот камп во 2010 била силувана од затворски чувар.

„Ми се закануваше дека ќе бидам понижена ако го одбијам. Дури и ми рече дека може да ми помогне порано да излезам ако го слушам што ми зборува“; рече таа.

Даниел Колинџ од ОН, кој е еден од коавторите на извештајот рече дека целта на проектот бил создавање на притисок врз Пјонгјанг да ја поправи ситуацијата.

Северна Кореја не реагирала на извештајот, но претходно критикита не сметка на состојбата со човекови права во оваа земја ги нарече заговор за соборување на режимот.