Албанската полиција ја затвори болницата „Медикер“ дел од групацијата „Санте плус“, откривајќи дека на пациентите им се продавале лекови со истечен рок како терапија за спасување, добивка од речиси 1 милион евра се криела во џебовите на сопствениците, додека испаднало дека работниците на оваа компанија се без социјално осигурување, објави ЈОК Албанија.

Во лисици заврши Едмонд Заја, 62-годишник наведен како администратор, но кој во реалноста немал никаква врска со управувањето на болницата. „Администраторот“, според извори за ЈОК Албанија, имал улога на готвач и возач во компанијата на Турчинот Билал Кара.

Во меѓувреме, вистинскиот сопственик, 45-годишниот Билал Кара, и сопственичката Герина Арапи се прогласени за барани од полицијата во Тирана.

Запленети се препарати за ботокс, филери и материјали за трансплантација на коса

За време на контролата во клиниката, полицијата заплени 100 блокови со нефискализирани сметки, 27 различни препарати за ботокс, филери и материјали користени при трансплантација на коса – најголемиот дел со истечен рок – како и шест компјутери што ќе бидат испратени на вештачење.

Меѓу пронајдените медикаменти бил и антибиотикот „Рифоцин“, со истечен рок во мај 2025 година, кој се користи за тешки бактериски инфекции, како и „Гадовист“, со истечен рок уште во 2023 година. И двата, според полицијата, се користеле за инјекции, естетски интервенции и анестезија, објави Дритаре.

Паралелно со оваа активност, клиниката се рекламирала на социјалните мрежи нудејќи бројни естетски процедури, меѓу нив полнење усни со филери и трансплантација на коса по цена од 980 евра.

Полицијата на Тирана нагласува дека истрагата продолжува за идентификување на сите вклучени лица, како и за утврдување на последиците кои можело да им бидат нанесени на клиентите поради користење на истечени медикаменти.

Кара е почесен конзул на Македонија во Измир

Инаку, Кара е почесен конзул на Македонија во Измир (Турција). Тој беше назначен за почесен конзул пред 2 години, со потпис на тогашниот министер за надворешни работи на Македонија, Бујар Османи.

Билал Кара е истовремено и претседател на Советот за бизнис Турција – Северна Македонија при Советот за надворешни економски односи (DEIK) од 2018 година. Тој е и член на Стопанската комора Албанија–Турција, објави Шќиптарја.

„Санте Плус“ е групација на здравствени установи, која вкупно има 12 медицински центри лоцирани на Балканот, земјите од Среден Исток како и во евроазиските земји. Пет од болниците на групацијата се во Македонија, Косово, Турција и Албанија.