Измените во Кривичниот законик го застареа случајот „Топлик“ кој се однесуваше на изградбата на Сончев град. На денешното судење, обинителот кој го застапуваше предметот, повикувајќи се на измените, се откажа од понатамошно гонење заради застареност со што од кривична одговорност ги ослободи пораншениот министер Јанакиески и членовите на комисијата за јавно наддавање во Министерството за транспорт и врски.

„Јавниот обвинител изврши преквалификација на кривичното дело кое им се става на товар на обвинетите од член 353 став 5 во член 353 став 4, а во правец на измените на Кривичниот законик. Врз основа на тоа Јавниот обвинител се откажа од понатамошно гонење на обвинетите заради настапена застареност (во смисла на член 352 од ЗКП)“, соопштија од Кривичниот суд.

Случајот Топлик требаше да се суди од почеток откако Апелациониот суд ја укина првостепената пресуда со која на затворски казни беа осудени Јанакиески и Претседателот на комисијата за наддавање, Ѓурчиловски. Останатите обвинети тогаш добија условни казни.