Градежна механизација започна да го чисти речното корито на Вардар во село Туденце, Општина Јегуновце.

Денешните активности значат и почеток на реализацијата на проектот за подобрување на отпорноста кон поплави во полошкиот регион, кој вклучува чистење на речното корито во општините Јегуновце и Тетово во должина од 17 километри. Министерката за животна средина Каја Шукова која беше во посета на населеното место Туденце, истакна дека се применува интегриран пристап за реализација на проектот во кој се вклучени владата, локалната самоуправа и странските организации.

„Започнуваме со санација, а тоа подразбира чистење на речното корито од градежен шут, комунален и кабаст отпад. Донатор е Швајцарска агенција за развој и соработка која одвои 12 милиони долари. Овој проект е кофинансиран и од Владата и од Општина Јегуновце. Предвидено е расчистување на вегетацијата по коритото и секако ќе се расчистува односно подига и градежен шут. Таа пракса на фрлање на градежен шут мора да престане. Сметот сами го фрламе и мора поодговорно да се однесуваме кон животната средина. Контроли има за ваквите девијантни појави, но проблем има со казнување како што се однесуваме на Запад така и тука треба да се однесуваме, фрлајќи отпад си правиме проблем на самите себе си.Не може да се постигне толку со чистење на сметот, колку што граѓаните фрлаат смет, затоа треба да бидеме поодговорни“, рече министерката Шукова.

Димитар Костадиновски градоначалник на Општина Јегуновце изјави дека санацијата ќе го опфати населеното место Туденце, Копанце, Роатинце и ќе заврши во Јегуновце.

„Ова е историски ден оти мештаните го чекаа ова со години. Ризикот од поплави и катастрофи ќе се сведе на минимум. Ова е првата фаза од проектот кој ќе се реализира. Сите граѓаните од Општина Јегуновце ќе бидат благодарни кога овој проект ќе биде завршен. Се надеваме дека изведувачот ќе го заврши проектот навремено. Проектот ќе биде фокусиран на чистење и ова е првата фаза.Се надеваме дека ќе биде започната и втората фаза, а тоа е регулација на коритото на реката Вардар“, рече градоначалникот на Општина Јегуновце Димитар Костадиновски.

Неколку села од Општина Јегуновце речиси секоја година се поплавуваат поради нерегулираното корито на Вардар. Проблемот се одолговлекува десетина години. Најавите на властите за регулација на коритото што би значело изградба на потпорни ѕидови и насипи се уште не се реализираат во пракса. Проектот стои само на хартија. Министерката Шукова и градоначаликот Костадиновски се надеваат дека по завршувањето на првата фаза од прооектот кој опфаќа чистење на речното корито ќе се обезбедат средства и за втората фаза, изградба на речно корито.

Во јуни годинава поради нерегулираното корито Вардар се излеа и поплави голема земјоделска површина, како и домови во село Раотинце, Општина Јегуновце.

ВИДЕО: Се излеа Вардар кај тетовското село Раотинце, поплавени се куќи и ниви