Заменик директорот на Национални шуми Кирил Михаил во гостување во вестите на Сител изјави дека овие месеци видел сешто, па имало случаи кога запалено глувче, запалена опашка на лисица, скакулци, може и вештачки инсекти ги ширеле пожарите. Во гостувањето тој рече дека 90 отсто од пожарите, намерно или ненамерно, се предизвикани од човечки фактор.

– Јас во текот на овие шест месеци видов сешто од глувче запалено кое ние пренесе пожар до лисица со запалена опашка во велешко ни направи страшна работа. Така да скакулците би сакал да ги продискутираме. Во текот на таа изјава која што беше дадена од нашите вработени ми се јавија неколку професори коишто ми кажаа дека постоја такви вештачки бубачки кои навистина може да пренесуваат пожари. Можеби треба да се направи добра анализа – изјави Михаилов.

Неговата изјава на својот Фејсбук профил ја демантираше Кирил Арсовски Пржо, еколог и професор по биологија кој вели дека запалени инсекти и животни не може да предизвикаат пожар биолошки и физички, а за вештачки инсекти пишува „немам коментар, срамота е“

-Веројатноста дека инсекти или запалени животни ги шират пожарите во Македонија е неверојатно мала, до непостоечка. Да, инсектите може директно или индиректно да помогнат во создавање на услови на шумски пожари. Ова е особено случај со инсекти кои го зголемуваат морталитетот на дрвјата поради инфестација. Создавање на повеќе мртви дрвја и сува дрвесина, создава повеќе гориво за лесно и брзо ширење на пожарите. Инсектите со тоа ја зголемуваат можноста на појава на пожари, нивниот интензитет и ширење. Инсектите се изградени од хитин и тој биолошки материјал иако горе, не создава пламен. Дури и да се создаде плане, не може да се задржи долго време. Инсектите имаат мала маса и тешко може да создадат запалива материјала, доволно силна да се пренесе на вегетацијата. Секако постои некоја, далечна теоретска можност да поголема групација (јато) на инсекти да биде запалена, па запалени саѓи да се пренесат преку ветрот и тоа да предизвика пожар, но тогаш веќе се навлегува во сериозна фантастика. Постои забележан случај во 2000 г. од САД, каде наводно штурец предизвикал голем шумски пожар, но ова никогаш не е научно докажано. Пожари предизвикани од запалени животни, се често дел од локална традиционална и урбана митологија и легенди. Инаку во природата, постојат инсекти наречени пирофили за чиишто живот е потребен шумски пожар зошто тие ги полегаат јајцата само во опожарено дрво, но тоа не значи дека ги предизвикуваат пожарите. Ниту една референтна организација која се занимава со шумски пожари ( US Forest Service, Cal Fire,European Forest Fire Information System) не ги наведува инсектите како вектор на пожари. Значи: Не, запалени инсекти (па и други животни) не може да предизвикаат ширење на пожар. Овој концепт е биолошки и физички невозможен во реални услови – пишува Пржо.

Во екот на пожарите во јавноста внимание предизвика изјавата дека скакулци ги ширеа пожарите, што покрена јавна дебата дали е можно или не.