Замре фреквенцијата на двата гранични премини на македонско-албанската граница кај Дебар, откако албанските власти воведоа двонеделен карантин за секој кој на албанската територија ќе влезе од Северна Македонија и од Грција.

При нашата денешна посета на преминот „Блато”, каде вообичаено фрекфенцијата на патници и возила е поголема, до попладнево минал само еден патник, албански државјанин за влез во нашата земја.

И во текот на вчерашниот ден минимална е фреквенцијата, а мал број лица кои минале е и во првиот ден од воведувањето на карантинот и главно се работи за лица кои не биле запознати со тоа.

– На преминот „Блато” на 20 овој месец, од кога стапи во сила одлуката на албанскиот Комитет на експерти за справување со пандемијата , влез оствариле 53 македонски и 65 странски државјани, додека излез оствариле 36 македонски и 51 странски државјани, изјави за МИА, Стефан Димоски, портпарол на Секорот за внатрешни работи од Охрид.

Додава дека на граничен премин Џепиште-Требиште, истиот ден влез оствариле девет странски државјани, а излез шест странски државјани.

Според Димоски на овој граничен премин нема влез и излез на македонски државјани.

Инаку, преку преминот „Блато” претходно дневно во просек минуваат по 500 лица, а преку преминот кај Џепште над 80, додека во саботните денови,кога во Дебар е пазарен ден над илјада, односно над 150 лица.

Албанските граѓани во Дебар, поради близината и богатиот избор доаѓаат и набавуваат прехрамбени и други прозводи, но голем е бројот на оние кои тука обезбедуваат и гориво, поради пониската цена и повисокиот квалитет.