Русија нема да прифати распоредување на странски мировници во Украина, што го побара украинскиот претседател Володимир Зеленски во рамките на безбедносните гаранции за неговата земја, изјави денес портпаролката на руското Министерство за надворешни работи Марија Захарова.

Таа истакна дека безбедносните гаранции што ги бара Зеленски се „неприфатливи“ бидејќи, како што рече, тие всушност се „гаранции за опасност“ за европскиот континент, пренесува РИА Новости.

„Сите овие идеи на киевскиот лидер, кои во суштина се копија на иницијативите на европските спонзори, дури ни спонзори, туку европски воени страни, како што веќе рековме многу пати, се апсолутно неприфатливи“, рече таа.

Според неа, овие гаранции имаат за цел да ја зачуваат Украина како отскочна даска за „терор и провокации“ против Русија, додавајќи дека секоја помош за Украина „само ја продолжува агонијата на киевскиот режим“ и носи сериозни ризици од ескалација на конфликтот.

Коментирајќи ја изјавата на претседателката на Европската комисија, Урсула фон дер Лајен, за постоењето на јасен план за испраќање мировници во Украина по прекинот на огнот, Захарова истакна дека е важно Европа да ја разбере руската позиција по ова прашање, пишува Тас.

„Судејќи според загубите на Украина, Европската комисија едноставно се надмина себеси. (Фон дер Лајен) исто така воинствено додаде дека телото што го води ќе проучи нови извори на финансирање за украинските вооружени сили и нагласи дека првата линија на одбрана во Украина е силна украинска армија, а втората е мултинационална коалициска група на доброволци со поддршка на Американците“, истакна Захарова, пренесува Танјуг.