Градоначалникот на Загреб, Томислав Томашевиќ, од зелено-левичарската коалиција Мозоме, денес го означи почетокот на новата услуга за јавен превоз, јавниот систем за велосипеди „Бајс“.

Жителите на Загреб ќе имаат пристап до 500 велосипеди распоредени на 40 станици почнувајќи од денеска, а цената е половина евро за половина час користење.

До крајот на октомври е планирано да се постават вкупно 2.000 велосипеди на 180 локации, со можност за додавање на уште 1.000.

Како што претходно најави Градот Загреб, проектот „Бајс“ е дизајниран како дополнување на јавниот превоз и е дел од пошироката градска стратегија насочена кон подобрување на квалитетот на животот на граѓаните, почист воздух и одржлив транспорт.

Тој е кофинансиран од градскиот буџет, а вкупната вредност на договорот, кој ги вклучува сите потребни услуги, е 9,3 милиони евра плус ДДВ, или околу 64 евра месечно по велосипед.

Услугата е склучена со договор за четири години, а системот ќе биде достапен секој ден, 24 часа на ден.

„Во секое време, најмалку 95 проценти од велосипедите мора да бидат во функција. Покрај тоа, цената за користење на „Бајс“ е многу прифатлива – возење до половина час чини 0,50 евра, додека претплатите се достапни по цена од само 5 евра месечно или 30 евра годишно“, рече Томашевиќ.

Велосипедите се поставени во близина на училишта, спортски објекти и јавен превоз со цел да се намали употребата на автомобили.