Откупните цени на грозјето оваа година ги усогласивме на состанок со сите винарии и таа ќе биде пониска за два денари, за кои Владата дополнително ќе интевенира со што ќе стигнеме до просечна откупна цена на Вранецот од 15 денари и на Смедеревка од 13 денари, изјави денеска премиерот Зоран Заев.

– Откупната цена на грозјето годинава ќе биде за два денари пониска. Наместо 13 денари, за Вранец ќе биде 11, а наместо 11 денари за Смедеревка ќе биде девет. Но, затоа тие два денара дополнително Владата ќе ги интервенира. Така ќе стигнеме до четири денари интервенција и просечна откупна цена на Вранецот од 15 денари и на Смедеревка од 13 денари, изјави Заев.

Посочи дека со винариите е разговарано и утврден е пат по кој ќе се движи, уште во четвртокот пред да биде избрана владата, и најави дека утре ќе ги посети лозарите од Тиквешијата, заедно со министерот за земјоделие, каде ќе ги информира за разговараното со винариите.

– Новина е дека два денари даваме за висококласните сорти на винско грозје, како Ризлинг и сите други. Тие се околу десет милиони килограми и тие ќе ги помогнеме. Остана да утврдиме како да помогнеме да се продаде вишикот останат во визбите од некаде 30 милиони килограми. Развивме механизми кои ги согледавме заедно Владата и асоцијацијата на винариите, на поддршка на транспортот во делот на транспортната цена за извоз на наливно и флаширано вино, изјави Заев.

Посочи дека винаријата Тиквеш вчера или завчера објавила некои цени кои се надвор од претходно договорено.

– Ќе разговарам со господинот Свето Јаневски. Тој беше советник во кабинетот на премиерот Спасовски, еден од значајните стопанственици во државата и верувам дека ќе изнајдеме решение, затоа што среќни производители на винско грозје се добри и за државата и за винариите и компаниите, изјави Заев.

Нагласи дека годинава е специфична и мора сите заедно да направиме посебни чекори.