Израелската војска изминатите неколку ноќи изврши неколку упади во Газа како подготовка за најавената копнена офанзива. Иако сè уште не е познато кога ќе започне офанзивата, некои нејзини контури веќе може да се видат врз основа на ноќните напади. Израелската армија подготви специјално оружје за влез во Газа.

Оваа палестинска енклава е многу густо населена, така што операцијата во станбените области на Газа бара специјализирана опрема за да се расчисти патот за 300 тенкови и 173.000 војници. На тој список се наоѓаат и две машини кои заедно тежат речиси 100 тони – „Namer“ и „D9R Dobi“.

Најзаштитеното оклопно возило во светот

Тешкиот оклопен транспортер „Намер“ (Тигар) е главен елемент на планот за модернизација на израелската армија.

Најновиот дизајн на Namer се базира на шасијата на главниот борбен тенк Merkava Mk.4. Моментално е едно од најзаштитените оклопни возила во светот. Тој и обезбедува на пешадијата ниво на заштита и мобилност што одговара на најновите главни борбени тенкови.

Првата серија на сериски возила беше испорачана во 2008 година. Израел планира да набави вкупно 170 тешки оклопни транспортери Намер. Првично беа планирани 386 возила, но подоцна оваа бројка беше намалена поради кратење на буџетот.

Неуништивото „ Плишано мече“ на израелската армија

Оклопниот булдожер D9R со прекар „Доби“ или „Теди беар “ е составен дел од копнените упади на територијата на Газа. Со 15 тони оклоп и сечиво, D9R е речиси непробоен за оружје и експлозиви.

Во Булдожерот може да седи возач и војник, а непробојното стакло на тоа возило им нуди заштита од куршуми. Во 2015 година, D9R беше надграден со „оклоп со летви“ за екипажот да се заштити и од ракетни гранати (РПГ) што широко ги користеше Хамас во претходните конфликти.

Неговиот мотор може да произведе 405 коњски сили и може да влече повеќе од 70 тони. Овој моќен мотор не само што му помага на булдожерот да помине пречки, туку може и да копа ровови, да помогне во изградбата на мостови или одбранбени структури.

„ Плишаното мече“ може да биде опремено со митралези или фрлачи на гранати.  Цената на D9R е нејасна, бидејќи израелската армија ги купува возилата директно од Caterpillar, а подоцна ги опремува булдожерите со нивниот специјален оклоп.

Сепак, основната цена на новиот булдожер Cat D9 е најмалку 900.000 долари, а неговата вредност за набавка е пред какви било дополнителни надградби.