Двете големи владеачки партии СДСМ и ДУИ се изјаснија против предлогот на Алтернатива за формирање на Заедница на албански општини во Македонија.

„Состојбата во Косово на никој начин не може да се преслика и во нашата држава. Согласно Законот за локалната самоуправа и согласно Законот за меѓуопштинска соработка, соработката помеѓу општините во нашата држава е апсолутно овозможена. Секоја општина може да соработува во било која форма, кога ќе си го најде интересот за одредена тема. Ова барање сметаме дека е несериозно, дека не треба да се користи за придобивање на политички поени и е неприфатливо на крајот на краиштата“, вели Санела Шкријељ од СДСМ.

Од ДУИ пак велат дека предлогот на Алтернатива е антиевропски и антиамерикански.

„Патетично, антиамериканско и антиевропско и оди на штета на конечното решение на косовското прашање. Неуспешен обид за опстанок на политичката сцена по доживеаното фијаско и целосно погрешно и деструктивно распоредување“, велат од ДУИ.

За првиот човек на опозицијата Христијан Мицковски доволен е Охридскиот договор и додава дека ваквите идеи можат само да ги влошат меѓуетничките односи.

Претходно од Демократскиот сојуз изјавија дека предлогот претставува сериозна закана за меѓуетничките односи, прикривање на криминалот и директно ги загрозува евроинтеграциските перспективи на Македонија.

Демократски сојуз: Ги осудуваме изјавите на албанските партии за дестабилизација на Македонија