Министерството за социјална политика, демографија и млади подготвило ревидирана листа на професии кои се сметаат за опасни и поради тоа за нив важи т.н. бенефициран стаж, односно работниците од тие занимања можат порано да се пензионираат. Од министерството засега не откриваат кои професии предлагаат да се избришат од листата, за која велат дека се користи уште од осамостојувањето на земјава.

„Брзиот развој на индустријата и континуираниот напредок на технологијата, заедно со подобрувањето и модернизацијата на условите за работа, наметнуваат потреба од ревидирање на листата на работни места кои се вршат во тешки услови или во услови кои ја намалуваат работната способност на работникот“, рекол денеска министерот за социјална политика, демографија и млади, Фатмир Лимани, обраќајќи се на презентацијата на новата, ревидирана листа на опасни занимања или работни места подобни за предвремено пензионирање во согласност со нивото на ризик и предложениот степен на пензија, соопшти министерството.

Експертите од ова поле денеска му ги претставиле на министерот активностите на темата, од кои еден од резултатите е ревизијата на листата на работни места со стаж на осигурување со зголемено траење – т.н. бенефициран стаж.

Лимани укажал на фактот дека ваквите листи на глобално ниво се прегледуваат редовно, обично на секои пет години. Во Македонија, пак, сѐ уште се користи иста листа на работни места од осамостојувањето на државата, наследена од поранешна Југославија.

„Ситуацијата во законодавството не ја прикажува реалната слика која ја имаме на терен, бидејќи од времето на утврдувањето на работните места со бенефициран стаж, настанати се значајни промени. Условите за работа се значително подобрени, а мерките за безбедност и здравје при работа се многу унапредени. Дополнително, некои индустриски гранки веќе не постојат, што ја прави таа листа неточна за актуелната ситуација“, вели Лимани.

Денешната презентација на ревидираните работни места со бенефициран стаж се заснова на неколку месечната теренска работа на експертите. Во таа насока, министерот обраќајќи се на присутните претставници на работодавачите и работниците, ги поканил активно да учествуваат во дискусиите со експертите. Лимани истакнал дека сите нивни забелешки и сугестии ќе бидат земени предвид пред листата да стане конечна.