Азис Шабани од Тетово над поливина век е мајстор за покривни конструкции. Неколку години е пред пензија, а вели дека целиот работен век го посветил и заработувал од овој занает, но разочарен е што нема кој да го наследи. Никој од неговото семејство не сака да продолжи да се занимава со овој занает, ниту пак може да најде луѓе за работа во време кога има многу барања за поправки или целосна промена на покривни конструкции.

– Жално е што нема кој да ме наследи, затоа што и моите деца заминаа да живеат и работат во странство. Инаку, овој занает сум го наследил од татко ми и од моите браќа. Ние работиме одамна, татко ми 50 години и јас скоро 40, тоа значи 90 години. Со овој занает сме живееле, сме растеле деца, во училиште оделе децата. И сега проблемот е што младите не го сакаат овој занает. Моите деца не се тука, земаме други и тие не сакаат, еве другарите што ги имам овде и тие се при крај на кариера што се вика. Јас уште една година-две – вели Азис Шабани.

Младите не сакаат да се занимаваат со занаети, а кога ќе одат во странство не бираат работа, додава тој. Вели дека и тука добро се заработува од речиси сите занаети.

– Јас сакам на младите да им пратам една порака, да не бегаат од овој занает. Треба да има стручна школа за овој занаeт. Младите да одат, како во странство што има школи за секој занает и така да продолжат. Што значи дека после мене, после нас постарите, нема да има кој да го продолжи овој занает. Работа има многу, но ќе нема кој да работи, тоа е голем проблем. Сите навалиле да одат надвор, и таму е тешко. Јас одам кај моите деца, гледам дека тие нон-стоп, од сабајле до вечер работат. Овде да се работи толку, како што тие трчаат таму, ние би биле побогати 100% – додава Шабани.

Во Тетовско и натаму голем број од идните средношколци своето школување го продолжуваат во општите насоки, а бројот на запишани ученици во стручните училишта е помал. Во текот на изминатите неколку учебни години во земјава се споведе кампањата „Учи паметно, работи стручно“, со цел да се одговори на дефицитот на стручни работници. Но состојбата на пазарот на трудот од година во година е сè полоша, сè повеќе се бара кадар за разни занаети, кој за жал наместо македонскиот го пополнува најчесто германскиот недостиг на работна стручна сила.