Угостителите што издаваат лежалки на Охридско-струшката ривиера со или без консумација не смеат да ја заобиколат обврската за издавање фискални сметки, велат за „Слободен печат од Управата за јавни приходи. Ваквиот одговор доаѓа по реакциите во јавноста и на социјалните мрежи дека дел од концесионерите на плажите на Охридско-струшката ривиера случајно или намерно ја „заборавиле“ оваа обврска.

Од УЈП се децидни дека тие се должни да воведат и користат фискален систем на опрема според член 2 став 1 од Законот за регистрирање на готовинските плаќања и задолжително да издаваат сметка за извршениот промет, односно услугата (фискална сметка), велат од оваа институција. Оттаму додаваат дека континуирано вршат контроли според Законот за регистрирање на готовинските плаќања, низ целата територија на државата, вклучувајќи ги Охрид и Струга.

На повеќето плажи во нашиот најубав туристички центар има опција за поставување сопствени плажни реквизити (лежалки, камп-столчиња или крпи) што е во согласност со законската обврска за 50 отсто слободен простор, но има и такви што нудат лежалки за изнајмување. За посетителите на хотелите, кои располагаат со свои уредени плажи, користењето е бесплатно, но за оние што не се хотелски гости, изнајмувањето сет од две лежалки со чадор чини 400 денари, без консумација. Што се однесува до цените на лежалките на плажите во Дојран, тие се или бесплатни се разбира ако порачате пијалак, додека некои ги изнајмуваат со фиксна цена од 130 денари за лежалка, но во комбинација со пиво, кафе и вода во шише. На една од најубавите плажи на Преспанското Езеро – Сливница, според објавите на Фејсбук, само за да влезете ќе ви наплатат 50 денари, без чадор или лежалка.

– Според член 9 од истиот закон обврската да се воведе и да се користи одобрен фискален систем на опрема за регистрирање готовински плаќања не се однесува на даночни обврзници што данокот од доход за приходите од вршење на дејност го плаќаат според паушално утврден нето-приход, освен таксистите, лицата што не се трговци за прометот на непреработено и сопствено земјоделско производство што го вршат на тезги на пазари, како и надвор од пазарите, физички лица што издаваат под закуп станбен или деловен простор, лицата што вршат дејности во објекти што се наоѓаат во населени места со број жители под 300 луѓе и кои се сместени во високопланински и тешко достапни места со исклучок на туристички места, лицата што вршат улична продажба на весници и списанија, колпортерска продажба, лицата што вршат улична продажба на лозовите што се употребуваат при приредување на игрите на среќа од типот инстант лотарија како и на картичките што се употребуваат при приредување на игрите на среќа од типот томбола; лицата што извршуваат континуиран промет, за кои издаваат сметки и за кои се предвидени последователни плаќања (испорака на струја, вода, телефонски услуги, греење и ладење и друго), продажба на добра или услуги преку автомати за продажба кои работат со монети и книжни пари – детализираат од УЈП.

Ова лето тринаесет охридски плажи беа уредени со урбана опрема, шанкови, лежалки, маси и столици, според Програмата за измена и дополнување на Годишната програма за поставување урбана опрема во Општина Охрид за 2023 година. Новите концесионери по тригодишна пауза ги добија плажите, кои сега мора да се уредуваат по препораките на УНЕСКО. Тоа значи дека не смее да има други градежни зафати, бетонски плочи или платформи со столбови поставени во езерото. Се разбира новите закупци се должни да им остават 50 отсто слободен простор на посетителите на плажите.

– Шанковите што ќе се поставуваат треба да бидат лесно монтажно-демонтажни и изработени од природни материјали, дрво или имитација на дрво, кои ќе се вклопат во околината, без притоа да се наруши основната намена на просторот и безбедноста на сообраќајот – стоеше во јавниот повик до идните концесионери на плажите.

Во буџетот за летување задолжително вметнете пари и за лежалки

За место на плажа, лежалки и чадори на црногорско приморје, ова лето цените се движат од 20 до 180 евра. На најпопуларните плажи на Халкидики сѐ уште има такви на кои немаат ограничување со пијалаци, а некаде за две лежалки со чадор без консумација наплатуваат 10 евра.

Чадорите и лежалките на плажите на монденскиот Хвар во Хрватска се посебен луксуз, а цените стигнуваат и до 40 евра по лежалка. Сепак и во Хрватска има плажи што изнајмуваат лежалки за 5 евра, но во некои ексклузивни плажи тие ќе ве чинат и до 130 евра. Во Турција за да изнајмите лежалка ќе платите од 4 до 40 евра.