Германската влада објави дека ќе се спротивстави на зголемувањето на буџетот на ЕУ на 2 трилиони евра за периодот од 2028 до 2034 година, предложено од претседателката на ЕК, Урсула фон дер Лајен, објави агенцијата Франс-прес, пренесува БТА.

„Значително зголемување на буџетот на ЕУ е неприфатливо во време кога сите земји-членки вложуваат огромни напори за консолидирање на своите национални буџети. Затоа не можеме да го прифатиме предлогот на Комисијата“, изјави портпаролот на владата Стефан Корнелиус.

„Ние нема да го поддржиме ниту дополнителниот корпоративен данок предложен од Европската комисија“, додаде тој.

Еден од новите методи на финансирање предложени од ЕК е данок на големите европски компании со годишен нето обрт од над 100 милиони евра.

„Мора да го задржиме реформистичкиот пристап на Комисијата и да се фокусираме на нови буџетски приоритети“, додаде Корнелиус.

Европската комисија вчера го презентираше својот предлог за буџет од 2 трилиони евра за 2028-2034 година, со дополнителни ресурси за конкурентност и одбрана.

Според Урсула фон дер Лајен, тоа е „најамбициозниот европски буџет предложен досега“ и го означува почетокот на две години честопати тешки преговори меѓу Европејците.

Буџетот предвидува издвојување до 100 милијарди евра за обнова на Украина, разорена од војната, и преглед на огромните субвенции во рамките на Заедничката земјоделска политика (ЗЗП).