Во завршна фаза е првиот дел од изградбата на првиот лот за топлификацијата за општините Битола, Новаци и Могила, информираат од АД ЕСМ Топлификација.

На локацијата спроти манастирот „Св. Богородица“ до Црна Река во Новаци, интензивно се работи на завршување на шахтата, што е еден од најкомплексните делови од изградбата на цевководот.

-Првиот дел на првиот лот и мрежата која почнува од РЕК „Битола“ до градот во должина од 12,8 километри ќе биде за брзо време завршена. Интензивно се работи за завршување на овој дел, бидејќи сите услови се исполнети. Дозволата е добиена, заврши рокот на желби. Ќе ја информираме Општина Битола и сите институции, и како што треба почитувајќи ги сите прописи ќе започнеме со изградба на цевководот-вели директорот на ЕСМ Топлификација, Горан Козаров.

Тој додаде дека кога се работи за изградба на вакви големи проекти, може само да дадат рок што е само на хартија, но кога ќе почне изградбата на мрежата ќе можат да дадат поточни информации за динамиката на работа, изведувачот и ЕСМ како инвеститор.

-Рокот е за 18 месеци да се заврши од влез во градот до крајна изведба до 35 установи. Во Битола мрежата ќе влезе на обиколницата на Дулие и потоа се шират паралелно двата крака. Едниот од Дулие кон населбата Карпош, покрај училиштето „Коле Канински“, Руска црква и „Партизанска“, а другиот продолжува по улицата „Иван Милутиновиќ“ па се до Гимназијата „Јосип Броз Тито“-информираше првиот човек на ЕСМ Топлификација, Горан Козаров.

Повеќе од 30 државни институции, судовите, полицијата, училишта, градинки, болницата, но, и одредени објекти што прават трансмисија на огромни количества гасови и загревањето на тие институции чини многу пари, до 2026 година ќе добијат топлинска енергија од РЕК.

Според Козаров, бенефитот ќе го почувствуваат прво тие, а потоа е предвидено мрежата да се разгранува низ градот, да се пројави интерес за колективните затоплувања каде што има постојни котларници.

-По нашите планови по пуштањето во работа на топловодот, таргет се осум топлани кои порано беа вклучени на Топлификација и опслужуваа од 2600 до 3000 станови. Паралелно се работат и другите лотови со изведување на потстаниците и топлотната кула која треба да е до градот Битола-додава Козаров.

Тој рече дека како претпријатие излегуваат во пресрет онаму каде што улиците се реновирани, а треба да минуваат цевки од топловодот да се промени трасата или тоа да се изведе на тротоарскиот дел, за да не се сече повторно асфалт и да се прави штета.

Инаку, изградбата на Топлификација „Битола“ е сон на битолчани што трае цели 40 години.

Топлификацијата на Битола од РЕК е желба на битолчани откако практично почна изградбата на Комбинатот, но, досега нејзината реализација не ја следеше многу среќа.

Така, првото претпријатие што се грижеше за затоплување на битолчани, „Топлификација Битола“ ДОО – Скопје, по неколку години работење, замина во стечај.

Оттогаш, битолчани практично се збогуваа со централното греење и неколку илјади домаќинства, особено во Нова Битола, мораа да се преориентираат на загревање со струја или дрва.

За да се реализира идејата за централно затоплување на Битола, пред повеќе од една деценија Општината Битола, во соработка со соседната општина Новаци и Аминдео од Грција, почна со реализација на прекуграничниот проект за топлификација „Телетерм“.

Со овој проект се планираше топлинската енергија што излегува од РЕК „Битола“ преку Општината Новаци, да стигне до Општината Битола, а со еден крак да се поврзе и со Општината Могила. Но, и од овој европски проект, кој ја имаше поддршката и од тогашната влада, а во кој требаше, покрај искуствата од Грција, да се користат и средства од Европската унија за прекугранична соработка, заврши без успех.

Од проектот „Телетерм“ не се случи ништо.

Сега сите погледи се свртени кон реализацијата на проектот за топлификација на Битола што го реализира АД ЕСМ заедно со РЕК „Битола“.

Овој проект ќе се реализира во неколку фази, со средства од кредитната линија на КфВ банка, во износ од 40 милиони евра, и сопствени средства на АД ЕСМ, во висина од над 7 милиони евра.