За прв упис во имотен лист (нов стан), граѓаните повторно ќе плаќаат само по 1.250 денари. Новиот директор на Агенција за катастар, Иван Живковски, најави намалување на ценовникот на нивните услуги за 75 проценти. Со оправдување за зголемени трошоци на струјата, на лиценците за софтвери, на покачените плати за вработените, претходното раководство реши граѓаните посебно да плаќаат по 1.250 денари за запишување на квадратурата на станот, за заедничките простории, како и за дел од земјиштето под зградата.

Тоа значи дека кога купувале нов стан, граѓаните во изминатите 8 месеци плаќале по најмалку 3.750 денари за упис во Катастарот. Доколку купувале и гаража, сумата дополнително им била зголемена за уште 1.250 денари, плус 600 денари за нотарски услуги.

Намалување ќе има и за оставинските постапки и договорите за дар каде што наплатата ќе биде 1.250 денари по правен основ за една катастарска општина, без оглед на бројот на имотните листови во катастарската општина, а не како досега 1.250 денари по имотен лист. Нема прецизни податоци за тоа колкава сума се слеала во Агенцијата по поскапувањето, но неофицијално таа се движи над 1 милион евра.

– На пример, доколку склучите договор за купопродажба на стан, треба да извршите упис во катастарот на 4 имотни листови – за станот, за земјиштето под зградата, за заедничките простории и за паркинг-местото. Во моментот, за оваа пријава се плаќаат 5.000 денари, но со измените во тарифникот, граѓаните ќе треба да платат само 1.250 денари по правен основ, што претставува намалување од 75 проценти на овој надоместок – истакна Живковски.

Од Комората на трговски друштва за геодетски работи ја поздравија најавата за корекција на цените на услугите на Катастарот. Никола Рибароски, претседател на КГР, за „Слободен печат“ потсетува дека ова енормно поскапување немаше врска со геодетите.

Катастарот ја искористи ситуацијата и вметна свои драстични поскапувања, кои немаа врска со нашите услуги – потенцира Рибароски.
– Претходното раководство ги правдаше ваквите поскапувања со зголемените трошоци на струјата, на лиценците за софтвери, на покачените плати за вработените, но ние поставивме контра прашање – зошто овие трошоци не ѝ пречеа на ниту една друга институција. Од друга страна, Катастарот во изминатите години не презеде никакви мерки за штедење, туку напротив се нижеа скапи службени патувања, за кои беа потрошени огромни државни средства – поентира Рибароски.

Агенцијата за Катастар и трговските друштва за геодетски работи се институции што работат по системот на „сврзани садови“, односно не можат едни без други, но нивните односи во последните години се толку заострени, што сериозно влијае врз работата на геодетите. Тие критикуваа дека имотниот лист што пред две години чинеше 153 денари, годинава стигна до 250 денари, а укажуваа и на енормните цени за запишување хипотека од 60 до 90.000 денари, за што реагираа и нотарите.

Ќе се реши и прашањето за лиценците за геодетите

Комората на геодетски друштва се сретнала со новото раководство на Катастарот, а претседателот Рибароски е оптимист дека ќе се реши и проблемот со двојните лиценци.
Според Правилникот, Катастарот издава и одзема лиценци за приватните геодетски друштва, што е директен противуставен и противзаконски упад во ингеренциите на Комората на геодети, бидејќи сега за иста работа има лиценца издадена од две различни институции!

– Ова е проблем за идните учества на тендерите што ги распишуваат општините. Тоа внесува забуна при изборот на фирмата, бидејќи некои фирми имаат една, други фирми друга лиценца, а некои имаат лиценци и од Катастарот и од нашата комора. Некои наши колеги веќе извадија лиценци и од Катастарот, што значи дека формирале нова фирма, извадиле нови документи и имале дополнителни трошоци – објаснува Рибароски.

Во моментот има околу 140 геодетски друштва, а 50 отсто од нив се на работ на егзистенцијата – особено оние во внатрешноста, бидејќи немаат работа.