Министерот за внатрешни работи на Србија, Александар Вулин вели дека терминот „Шиптар“ не е навредлив, дека претставува синоним за Албанец и му порача на пратеникот Шаип Камбери да престане да ги учи Србите како да говорат.

Камбери, кој е пратеник во српското Собрание од редовите на Коалицијата „Обединета долина“ – СДУ, вчера при поставување на пратеничко прашање на албански јазик му забележа на министерот за употреба на изразот „Шиптар“.

Камбери денеска не се појавил во Собранието на Србија, а Вулин во реакцијата истакна дека „секој има право да говори на својот јазик и дека тој никогаш не би го скратил тоа право на своите сограѓани Шиптари“.

– Шиптар има право да говори на својот јазик. Не е коректно што не ни овозможи превод, но тоа зборува за него, рече Вулин.

Тој додаде оти не разбира во што е проблемот да нарекува еден народ онака како што го нарекувал и неговиот дедо и прадедо, наведувајќи дека е „тешко да се најде Србин кој не вели Шиптар, баш како што е тешко да се најде Шиптар кој не вели Шиптар“.

Вулин истакна дека во 20 век, „Шиптарите трипати го променија своето име“’ и по падот на Отоманската империја рекле дека „повеќе не се Арнаути, туку Шиптари и дека нивната земја е Шќиприја“.

– И нивната книжевност и граматика ја следеа таа промена. Никаде не пишуваат „ние Арнаути“, туку „Шиптари“. Србите го добија тој збор од нивниот јазик, буквално без превод, додаде Вулин.