На средбата разговаравме за европската иднина на регионот, за која едни имаат поголем ентузијазам, а други помал, истакна српскиот претседател Александар Вучиќ кој единствен имаше посебна изјава за новинарите на средбата на Процесот Брдо-Бриони истовремено со официјалната прес-конференција на копретседавачите Пендаровски, Пирц Мусар и Милановиќ.

Тој рече дека денот поминал во конструктивна дискусија и дека во декларацијата стои дека е потребно членство во ЕУ што поскоро, а најдоцна до 2030 година.

-Ова се убави желби, но кој сум јас да го уништам оптимизмот и да им ја намалам амбицијата на некои други. Одлично ако е така, но не сум сигурен – изјави Вучиќ.

Брдо-Бриони: Европа во две брзини не е прифатлива, ниту одлагање на пристапувањето во ЕУ поради билатерални спорови

Тој повтори дека Србија го почитува македонскиот народ и нема спорови.-Секогаш некој нешто ќе смисли, ние го сакаме македонскиот народ, ја почитуваме државата Северна Македонија, ништо не бараме и да го чуваме нашето пријателство, одговори Вучиќ за бугарската блокада на Македонија на евроинтегративниот пат.

Тој додаде дека има нешто важно што сака да го каже, во Скопје, но и на претставниците во Белград.

-Важно е за нас ние од регионот да бидеме блиски едни со други, да си ги развиваме односите, да си ги скратуваме процедурите меѓу нас, да обезбедиме слободен проток на луѓе, стоки, услуги и капитал, ние да бидеме тие кои со својата стапка на раст ќе биде повисоко од европската во наредните 10-15 години, и ако ги видите прогнозите на ММФ и СБ, ние драстично ќе ја намалиме разликата од Западна Европа и да се претставиме како единствен блок и покрај разликите и така да настапуваме пред ЕУ, изјави Вучиќ.

Тој додаде и дека „безброј пати на сите форуми секогаш говорел дека Србија го признава и македонскиот јазик и територијата на Северна Македонија и црквата и никогаш никаков проблем сме немале и ќе продолжиме да водиме таква политика“.

На новинарско прашање за бугарското и хрватско барање за воведување санкции кон Русија, Вучиќ рече:

-Како се сетија да зборуваат за тоа дека Србија мора да воведе санкции кон Русија. Од сите теми се најдоа Хрват и Бугарин да зборуваат за тоа што треба Србија да работи. Ајде убаво, имате вие свои проблеми и маки, грижи се ти Бугарину што ќе работиш во својата земја, како и ти Хрвату, немојте да се мешате во работите на Србија и не се правите многу умни, одговори Вучиќ.