Уша Венс, сопругата на американскиот потпретседател Џеј-Ди Венс, ќе престојува во официјална посета на Гренланд од четврток до сабота, соопшти денеска Белата куќа, во време кога Доналд Трамп изразува желба да ја анектира оваа автономна данска територија.

„Втората дама“ на Соединетите Држави „ќе патува со својот син и американска делегација за да ги посети историските места, да дознае за наследството на Гренланд и да ја гледа Аванната Кимусерсу, националната трка со кучиња на Гренланд, во градот Сисимиут“, се вели во соопштението на Белата куќа.

На трката ќе учествуваат околу 37 гоначи и 444 кучиња и ќе понуди „извонреден приказ на брзина, вештина и тимска работа“.

„Г-ѓа Венс и делегацијата се возбудени што можат да бидат сведоци на оваа монументална трка и да ја почитуваат културата и единството на Гренланд“, се вели во соопштението.

Трката започнува во сабота, кога Уша Венс треба да се врати во САД.

 

View this post on Instagram

 

A post shared by Second Lady Usha Vance (@slotus)

Советникот за национална безбедност, Мајкл Волц, исто така, наводно, треба да отпатува за Гренланд оваа недела, иако на посебна маршрута од Венс. Неговата посета најпрвин беше објавена од две дански новински куќи, Берлингске и Јиландс-Постен, а дополнително беше потврдена од анонимен извор за CBS News, кој додаде дека Валц ќе ја посети вселенската база Питуфик.
Според извештаите, американската влада побарала формални средби со претставници на Данска и Гренланд, барања кои биле одбиени.

Данската премиерка Мете Фредериксен денеска реагираше на оваа објава, велејќи за гренландскиот весник „Sermitsiaq“ дека посетата на Уша Венс „не може да се смета за независна од јавните изјави на Доналд Трамп.

„Сакаме да работиме со Американците“, изјави Фредериксен за весникот. „Сепак, ова мора и треба да биде партнерство засновано на основните вредности на суверенитет и почит меѓу земјите и народите. Ова е нешто што го сфаќаме сериозно“.

„Дијалогот со САД во врска со Гренланд ќе се води во тесна координација меѓу данската влада и идната влада на Гренланд“, додаде таа.

Враќајќи се во Белата куќа на крајот на јануари, Доналд Трамп со месеци ја изразува својата желба да го заземе Гренланд, без да исклучува прибегнување кон сила.

Оваа арктичка територија, четири пати поголема од Франција, е од стратешки интерес главно поради нејзината локација – таа е на најкратката рута во случај на потенцијално лансирање ракета меѓу САД и Русија – и поради нејзините минерални ресурси.

Во средината на март, Доналд Трамп процени дека анексија од страна на Соединетите Држави на крајот „ќе се случи“ и дека тоа, според американскиот претседател, ќе биде во корист на „меѓународната безбедност “.

За време на неговиот прв мандат од 2017 до 2021 година, републиканскиот лидер веќе ја предложи идејата за купување на Гренланд, добивајќи целосно отфрлање од данските и гренландските власти.

Гренландскиот премиер Муте Егеде остро го критикуваше Трамп за неговиот предлог, истакнувајќи дека „Гренланд е наш“.

Трамп го форсира својот план за стекнување на Гренланд и тврди дека тоа е неопходно за потребите на националната безбедност. Тоа е земја за која рече дека САД ќе ја добијат „на овој или оној начин“.

Посетата на Венс ќе биде втора американска посета од мандатот на Трамп.

Синот на Трамп, Доналд Трамп Јуниор, го посети Гренланд на почетокот на јануари за да „сними забавна видео содржина за поткаст“.