Поранешниот премиер Александар Стуб и поранешниот министер за надворешни работи Пека Хаависто денеска се натпреваруваат во вториот круг од претседателските избори во Финска, откако ниту еден од кандидатите не обезбеди доволно гласови во првиот круг пред две недели.

Гласачките места се отворени од 9 до 20 часот по локално време.

И двајцата кандидати се проевропски настроени и го поддржуваат членството во НАТО, поради што не се очекуваат големи промени во политиката на Хелсинки.

Во првиот круг конзервативецот Стуб освои 27,2 отсто од гласовите, а Хаависто од Зелените освои 25,8 отсто. По првиот круг тие меѓусебно си честитаа и водеа кампања без меѓусебни навреди, со меѓусебно почитување и дискусии за политиката.

Последните анкети спроти изборите укажуваа дека Стуб е благ фаворит, со предност од 54 наспроти 46 отсто, но имаше и голем број лица што не се определиле за кого ќе гласаат.

Победникот ќе ја преземе функцијата на почетокот на март, наследувајќи го претседателот Саули Ниинисто, кој по два шестгодишни мандати повеќе не може да се кандидира. Претседателот на Финска се избира директно и има значителни овластувања во надворешната и безбедносната политика.

Финска споделува 1.340 километри долга граница со Русија. Под раководство на Нинисто и по руската инвазија на Украина, нордиската земја одлучи да аплицира за членство во НАТО во 2022 година, по речиси едновековна неутралност.