Германскиот министер за надворешни работи Јохан Вадефул сака да изгради сеопфатни односи со Индија за да ја направи Германија понезависна на глобално ниво, објавува германската новинска агенција ДПА.

„Индија е клучен партнер за нас во светот, за да можеме да се позиционираме економски и стратешки на посеопфатен и побезбеден начин“, рече Вадефул пред неговата посета на Индија. Исто така, во наш заеднички интерес е да развиваме соработка во безбедноста и одбраната и соработка во вооружената индустрија, додаде министерот.

Првата посета на Вадефул на најголемата демократија во светот, со околу 1,4 милијарди жители, е делумно последица на агресивната трговска и царинска политика на американскиот претседател Доналд Трамп. Вадефул додаде дека економските односи можат да напредуваат само ако има луѓе кои придонесуваат за тоа на конкретен начин. Затоа, една од главните дискусии што ќе ги има во Њу Делхи ќе се однесува на стекнувањето квалификувана работна сила, пренесува Феникс магазин.