Жители на Пештани денеска одржаа протест пред влезот на авто кампот „Градиште“ на кој побараа „Правда за Градиште“ и враќање на имотите, по примерот на Македонската православна црква, на која државата и го врати денационализираниот имот.  Иако во неколку наврати Управниот суд пресудил во нивна корист, пештанци велат дека институциите ги игнорираат и остануваат на ставот дека не постојат услови за враќање на земјиштето кое е денационализирано во 1957 година, објави Охрид Њуз.

Нивната агонија трае 21 година, велат на протестот пештанци.

-Сите закони се во наша корист исто така и Уставот и мора да се истрае. Со нашите имоти стопанисува узурпатор кој нема никаков документ. Според пресуда на Управниот суд внатре стои дека тој има третман на узурпатор – велат жителите кои денеска со транспаренти излегоа на протест и побараа доследна примена на Законот за денационализација донесен од Собранието.

Како на оштетена страна во процесот, на овие жители не им се дозволува ниту влез во кампот, „додека таму некој прави милиони на нивните имоти“.

Тие не се согласуваат со понудените од 240 до 270 денари за метар квадратен бидејќи сметаат дека  е далеку од реалната пазарна цена за атрактивното земјиште на кое е изграден авто кампот „Градиште“.

Според здружението „Оревче“ кое го организираше денешниот протест, тука не станува збор за земјоделско земјиште.

-Ако треба на државата да и дадеме по 200 денари спремни сме сите да и дадеме за да не ја оштетиме и имотот да го вратиме назад. Тука има профитери и криминал – истакнаа учесниците на протестот, објави порталот Охрид њуз.

Стотината наследници од 36 семејства бараат враќање на околу 15.000 метри квадратни атрактивен имот во Градиште, чија вредност се проценува на околу 30 милиони евра и најавија порадикални протести доколку не добијат правда – враќање на имотите на наследниците или обештетување по пазарна цена.

Фирмата ТД МКМ Нова Трејд ДООЕЛ, с.Пештани, Охрид – закупец на aвтокампот Градиште реагираше со соопштение во кое се вели дека тие имаат уреден договор за закуп со закуподавецот ИНЕКС Горица АД Охрид и ги поседуваат сите потребни одобренија и дозволи издадени од надлежните институции и оттаму нема да дозволат да биде загрозено нивното работење, поради што ангажирале и обезбедување на aвтокампот „Градиште“.