Со најновите одлуки на Државната изборна комисија (ДИК) уште еднаш се докажа дека „Европскиот фронт“ предводен од Демократската унија за интеграција нема капацитет и кредибилитет да спроведе слободни, фер и демократски избори, обвинијата денеска од коалицијата „Вреди“.

Како што додаваат од „Вреди“, ваквите обвинувања се на основа на неколкуте примери потврдени и од ДИК, која постапувајќи врз основа на приговорите на Коалицијата поднесени за некои избирачки места во 6. Изборна единица, како и постапувајќи според одредбите од Изборниот законик, одлучи да ги отвори гласачките кутии за 7 избирачки места, при што во 4 од нив се констатирани неправилност.

– Неправилности има во избирачко место 2101, село Ларце, општина Желино. Констатирано е дека во гласачката кутија има 1 глас повеќе во корист на Европскиот фронт од гласачите кои го искористиле своето право на глас, во избирачко место 0387 Гостивар и избирачко место 1953 Тетово имаше корекција на изборниот резултат, бидејќи во овие избирачки места се пребројувале неважечките гласови и се броеле како гласови на Европскиот фронт – изјави Фатмир Сабриу, портпарол на Беса, партија која е дел од коалицијата „Вреди“.

Од Коалицијата велат дека „таканаречениот Европски фронт, злоупотребувајќи ги сите механизми на владењето, незаконски ја нарушил и искривил волјата на граѓанинот, спроведувајќи ‘бугарски воз‘ како што се случаите веќе потврдени со одлука на ДИК во Липково и Ларце.

– Замислете од 7 отворени гласачки кутии, во 4 биле откриени неправилности и кражба на гласови. Со ова јасно се докажува зошто ДУИ денес е во паника. Тие се во паника не само што ќе си заминат во опозиција, туку и ќе одговараат за злоупотребите и кршењето на законите, но и затоа што вчера, со отварање на кутиите се докажа дека преку злоупотреба на механизмите на власт, закани, уцени, притисоци и бугарскиот воз, се обиделе да ја нарушат волјата на народот и изборниот резултат – изјави Сабриу.