Дел од товарен воз што сообраќал од Гевгелија кон Солун, синоќа делумно излетал од шините во близина на Поликастро во северна Грција, а според првиот човек на железничкиот синдикат, поради нанесената штета на шините за околу два месеци ќе биде затворена рутата Скопје-Солун, јавува „Прототема“.

Од компанијата „Хеленик трејн“ велат дека вчера околу 21:30 часот во близина на Поликастро „делумно излетала од шините задната оска на втората локомотива на товарниот воз 45201, кој сообраќа на релација Гевгелија-Солун“. Оттаму додаваат дека немало опасност за екипажот на возот, а компанијата ги истражува причините за инцидентот.

Генералниот секретар на грчкиот Железнички синдикат, Никос Цикалакис, изјави дека екипи ја проценуваат ситуацијата, како и дека е можно целосно да се затвори станицата Идомени за да се санира штетата.

– Според првичните информации, штетата е над четири километри, па европската рута на земјава од Скопје ќе биде затворена два месеца, изјави Цикалакис и додаде дека во тоа време, ќе постои само линијата од Бугарија и само таа ќе се користи за меѓународен сообраќај.

Информацијата дека поради штетата на шините, меѓународната линија преку Скопје, се очекува да остане затворена околу два месеци ја пренесе и државната телевизија ЕРТ повикувајќи се на извори од ОСЕ.