Ворен Бафет донираше уште 6 милијарди долари во акции на Беркшир Хатавеј на Фондацијата Гејтс и четири семејни фондации, што е неговата најголема годишна донација откако почна да го дава своето богатство пред речиси две децении. Донацијата од околу 12,36 милиони акции на Беркшир Б го зголеми неговиот вкупен придонес во хуманитарните организации на повеќе од 60 милијарди долари.

Дури и по оваа донација, Бафет сè уште поседува 13,8% од акциите на Беркшир Хатавеј, врз основа на вкупниот број издадени акции. Пред донацијата во петокот, неговото богатство изнесуваше 152 милијарди долари, што го прави петти најбогат човек во светот, според листата на списанието Форбс. По донацијата, тој падна на шестото место.

Оваа донација ја надмина минатогодишната, кога тој донираше 5,3 милијарди долари во јуни, додека во ноември донираше уште 1,14 милијарди долари на семејни фондации.

Во изјава, Бафет рече дека нема намера да продава акции на Беркшир. Бафет, кој сега има 94 години, почнал да дава големи донации во 2006 година. Минатата година го изменил својот тестамент, предвидувајќи дека 99,5% од неговото преостанато богатство по неговата смрт ќе оди во добротворна фондација што ќе ја надгледуваат неговите деца.

Неговите деца – Сузи (71), Хауард (70) и Питер (67) – ќе имаат околу десет години да ги распределат средствата, а одлуките ќе треба да се донесат едногласно.

Бафет е на чело на Беркшир Хатавеј од Омаха (Небраска) од 1965 година. Денес, компанијата вреди 1,05 трилиони долари и поседува речиси 200 компании, вклучувајќи ги Geico Insurance, BNSF Railroad и акции во голем број големи компании како што се Apple и American Express.

Фондацијата Хауард Г. Бафет се фокусира на борба против гладот, трговијата со луѓе и решавање на конфликти. Фондацијата NoVo им помага на маргинализираните девојки, жени и домородни заедници.