Во руски воздушен напад врз училиште во северозападна Сирија, во кое биле сместени бегалци, загинале осум луѓе, помеѓу кои и пет деца, јавуваат светските медиуми.

Сириската опсерваторија за човекови права, со седиште во Лондон, известува дека цел на нападот бил селото Џобас во близина на градот Сарекеба, источно од провинцијата Идлиб.

Според ООН, околу 60.000 луѓе се раселени во последните неколку недели поради жестоките напади врз Идлиб, последното упориште на сириските бунтовници.

Бунтовниците и владините извори велат дека сириските војници, со помош на Русија, опколиле турско набљудувачко место во Маарат ал Нуман.

Ова е прв голем напад откако водачите на Турција, Русија и Иран се согласија во Анкара во септември да го решат конфликтот во Идлиб по борбите во кои принудија 500.000 луѓе да ги напуштат своите домови.