Бугарската Главна дирекција за борбра против организираниот криминал (ГДБОП) ги неутрализираше активностите на организирана криминална група која го оштетила буџетот за над 3 милиони лева. За време на специјализирана полициска акција, на 20 јануари, беше уапсен водачот на организацијата – 44-годишен маж, соопштија бугарските власти.

Антимафијашките органи утврдија дека шефот на криминалната група директно или индиректно контролирал повеќе фирми, затајувал данок и вработувал лица без договори за вработување за да ги избегне придонесите за задолжителното државно социјално и здравствено осигурување.

Во овој случај беше поведена претистражна постапка за кривични дела од чл. 321, во врска со чл. 253 и чл. 255 од Кривичниот законик на Бугарија

Во текот на истрагата беа претресени 6 адреси на територијата на главниот град. Запленети се поголем број договори, полномошници, сметководствени и други документи, како и опрема користена за извршување на криминалната активност.

Прелиминарните податоци укажуваат на штета на буџетот од над 3 милиони лева. При претресите е пронајдена и поголема количина муниција, оружје и експлозивни материјали.

Работата на случајот продолжува под надзор на градското обвинителство на Софија.