Во полициска акција во текот на ноќта биле запленети 11 парчиња оружје за кои се верува дека имаат поврзаност со криминалната група Беланоца/Барон чии членови беа приведени неделава.

Акцијата продолжува денеска каде единици на МВР се со засилено присуство на повеќе локации во земјата.

Заплената е извршена во рамките на акцијата за сузбивање на насилни криминални групи на повеќе локации, којашто почна во неделата. Во рацијата се извршени претреси кај 26 лица на вкупно 30 локации, од кои 28 на подрачје на Скопје и две на подрачје на Велес. Досега е пронајдено огнено оружје, друга опрема, панцири и над 30 милиони денари во различни апоени кај осомничените. Одземени се и пет оклопни возила, накит, мобилни телефони, часовници, ресивери…

Вчера 30-дневен притвор им определи Кривичниот суд на четворицата членови на криминалната група Беланоца/Барон. Тие беа спроведени во судот по акцијата на МВР и Јавното обвинителство во изминатите два дена.