Дваесет лица, меѓу кои и полицајци, беа уапсени во среда во БиХ под сомнение за корупција и вмешаност во организиран криминал, потврдија судски извори.

Обвинителството на Унско-Санската жупанија соопшти дека голем број лица се уапсени во рамките на операцијата „Коцки“, меѓу кои и полицајци и одговорни лица на економски компании, поради постоење основано сомнение дека сториле кривични дела злоупотреба на положба или овластување и примање или давање подароци или други форми на корист или тргување со влијание.

Локалните медиуми дополнително објавија дека во акција координирана од полициската управа на Министерството за внатрешни работи на Федерацијата Босна и Херцеговина во областа Сански Мост и Приједор, се приведени лица осомничени за примање или давање поткуп за прикривање на незаконитости во работењето на рудникот за јаглен Каменград.