Ликовната изложба „Современата уметност во Битола“ ќе претстави пресек на автори и дела поврзани со Битола. На изложбата беа поканети да учествуваат со свои дела уметниците кои работат и творат во Битола, ченовите на ДЛУБ , уметниците кои се родени или потекнуваат од Битола и околината, но и оние кои живееле и работеле на овие простори и своите дела ги инспирале од пределите, луѓето и настаните во овој град, како и наследниците на уметниците кои веќе не се помеѓу нас, но како завештание ги чуваат нивните дела.

Сите тие благородни луѓе, уметници и творци ги отстапиле делата на уметниците чие име продефилирало во градот и оставило трајни ликовни вредности и на тој начин придонеле да биде составена изложбата.

– Голема е благодарноста и до приватните колекционери на ликовни дела, кои покажаа несебичност и доблест, да ги отстапат делата кои се во нивна сопственост како би биле застапени сите значајни ликовни автори. Тука би го издвоиле колекционерот Драги Филевски и Меѓународната ликовна колонија „Де Ниро“, кои обезбедија четириесетина дела – истакнуваат од Културен и информативен центар – Битола, како организатори на изложбата.

Со оваа изложба за првпат се промовира и галерискиот простор во Палатата на културата – Офицерски дом при ЈОУ Културен и информативен центар – Битола.

– Битолскиот ликовен феномен, денес е еден вид на творечки трезор на голем творечки потенцијал којшто овој град го доближува до значајни ликовни центри. Тоа е особено видливо по Втората светска војна, кога севкупниот ликовен потенцијал од пред тоа, сега се развива афирмативно, убедливо и потврдено низ низа изложби во Македонија, тогашна Југославија и пошироко.

Покрај појавата на поголем број ликовни уметници, со броен и истакнат опус, градот добива и ликовна галерија во која се организираат бројни ликовни изложби од домашните автори, но и неверојатни ликовни потфати како што се: францускиот импресионизам, германскиот експресионизам, кинеска уметност, бројни изложбени активности во претставувањето на најактуелните естетски и идејни движења во тогашна Југославија и на Балканот.

Овој галериски центар ги обединува сите творци, внесувајќи значајна ликовна динамика и континуитет. За жал, во последниве децении градот остана без галериски простор, според волуменот и ентериерските стандарди својствени и карактеристични за институција која ќе ја претставува ликовната уметност достоинствено и според стандардите кои ѝ прилегаат на нејзиното присуство во градот.

Изложбата „Современата уметност во Битола“ организирана во Културниот и информативен центар во Битола има за цел, да ги собере, обедини, афирмира ликовните творци. Сметаме дека овој простор, за првпат по неколку децении исполнува одредени важни галериски критериуми со кои или преку кои ќе се обидеме да го вратиме овој исклучително значаен креативен и творечки сегмент – истакнува Лили Бошевска, директорка на КИЦ-Битола.

Отворањето на изложбата „Современата уметност во Битола“ е закажано за 13 јули, во 20 часот.