Унгарија усвои мерки со кои се забранува увозот на копитари и производи од животинско потекло од пет земји од ЕУ, вклучувајќи ја и Хрватска, со цел да се намалат економските ефекти од нарушувањата на пазарот поради појавата на лигавка и шап во Унгарија, објави во среда хрватското Министерство за земјоделство. „Заради координирани активности за заштита на пазарот, односно намалување на економските ефекти од нарушувањата на пазарот поради појавата на лигавка и шап во Унгарија, Унгарија усвои регулатива за мерки за забрана на увоз од пет земји од Европската Унија, имено Хрватска, Чешка, Полска, Словенија и Романија“, наведува Министерството, информира Н1 Хрватска.

За овие земји се воведува тримесечна забрана за увоз на пратки живи копитари, репродуктивен материјал што потекнува од копитари и производи од животинско потекло што потекнуваат од копитари, освен за производи што се подложени на третман за намалување на ризикот. Исто така, забранет е увоз на нуспроизводи што потекнуваат од копитари и храна за фармски животни. Транзитот на пратки низ Унгарија останува дозволен, но под услов пратките да ја напуштат унгарската територија најдоцна пет дена по влезот.