Денес во Белград се отвори саемот за вино, храна и туризам „Винска визија на Отворен Балкан”. Заедничката порака на претседателот на Србија Александар Вучиќ и на премиерите на Северна Македонија и на Албанија – Димитар Ковачевски и Еди Рама на отворањето на Саемот е дека со оваа регионална иницијатива се создава заеднички пазар, се овозможува регионален туристички настап и сега, во време на криза, се создаваат предуслови полесно да обезбедиме храна.

Вучиќ порача дека иако овој Саем е во Белград, тоа не е саем на Србија, туку саем на Отворен Балкан и затоа ќе го отворат тројцата премиери заедно.

– Денес Белград и Отворен Балкан се престолнина на виното. Овде се собрани 230 излагачи од земјите од Отворен Балкан и 100 излагачи од целиот свет- од Франција, Чиле, Аргентина… Посакувам сите на Отворен Балкан да си го најдат своето место. Каде е виното, таму е и љубовта. А наша заедничка работа – моја и на премиерите на Северна Македонија и Албанија е да ги симнеме бариерите меѓу нашите држави – рече Вучиќ.

Македонскиот премиер, Димитар Ковачевски рече дека овој Саем покажува како во пракса функционира Отворен Балкан.

– Денеска потврдуваме дека Отворен Балкан е економска иницијатива. Таа значи интеграција, добрососедство, отворени врати. Денес тука се 42 наши винарници, три дестилерии и десетина производители на храна. Заедно со другите излагачи, ова е саем кој само вака регионално организиран, на едно место може да собере толку производители. Отворен Балкан нуди нови можности за пласман и нови можности за прилив на средства и за инвестиции. Денеска во Белград се вкрстија винските патишта на Балканот – рече премиерот Ковачевски.

Ковачевски, со гордост потенцираше дека Северна Македонија е втор најголем извозник на вино во регионот и 29-ти во светот.

Премиерот на Албанија Еди Рама порача дека со Отворен Балкан полесно ќе стигнеме до ЕУ.

– Денеска сме посветени на винарниците. Даваме шанса нашите винарници да се промовираат регионално, сите заедно да соработуваме меѓусебно. Албанија секоја година сади се повеќе грозје, а земјоделците добиваат значајна поддршка од државата – рече Рама.

На крајот од заедничкиот говор беше отворено и огромно шише со вино, произведено со грозје од Македонија, Србија и Албанија.

Саемот ќе биде отворен до 4 септември.

Утре ќе се одржи и традиционалниот лидерски политички самит на Отворен Балкан предводен од претседателот на Србија, Александар Вучиќ, премиерот на Северна Македонија, Димитар Ковачевски и премиерот на Албанија, Еди Рама. Подоцна премиерот Димитар Ковачевски ќе приреди „Македонската вечер”.