Новата сопственичка структура на трговскиот центар „Соравија“ во Скопје ќе биде: 51 процент за компанијата „Пе-вла-ку“, сопственост на албанскиот бизнисмен Владимир Пјетерѓокај, 39 отсто сопственост на „Тхор индустрис“, сопственост на Дрин Ахмети, внук на Али Ахмети, и 10 отсто на досегашниот сопственик Хано Соравија, сопственик на „Соравија груп“. Споменувањето на името на внукот на Ахмети во јавноста предизвика лавина коментари, но неговиот внук, како и партнерите во оваа бизнис-зделка се категорични дека во неа нема ни грам политика, политичко влијание, и дека е само резултат на бизнис-интереси на успешни луѓе.

Хано Соравија на прес-конференцијата со новинарите рече дека во оваа бизнис-зделка не гледал интерес во презимето Ахмети, туку нашол партнер што е образован и интелигентен.

– Не е важно што Дрин има 25 години. И јас кога почнував, бев млад. Верувам во неговата едукација и во обученост – рече Соравија.

Тој објасни дека деловно-трговскиот центар „Соравија“ во Скопје достигнал долг од 20 милиони евра и тоа е долг кон банки. Според него, во менаџирањето треба нова енергија, која ќе му овозможи да се развива и така да се отплатуваат долговите. Соравија рече дека не знае точно колку чинел трговскиот центар кога се градел и дека тоа може да се провери, но дека според неговите сеќавања било 10-12 милиони евра.

Колку Дрин Ахмети платил за учеството од 39 отсто во „Соравија“?

Ахмети објасни дека тој, заедно со неговиот партнер Пјетерѓокај, всушност го преземаат долгот, но истовремено земаат и кредитна линија. На новинарското инсистирање колку пари точно се дадени преку неговата фирма за преземање на 39 отсто од „Соравија“, тој не кажува износ за преземање, туку објаснува дека е преземен долгот од 20 милиони евра и е земена кредитна линија од 6 милиони евра, благодарение на Пјетерѓокај, кој, пак, е мнозински акционер во „Крединс банка“ од Албанија, која ја даде кредитната линија.

-Писмо за интерес испративме во април минатата година, кога ги анализиравме и финансиите на „Соравија“. Дојдовме до информација дека имаат голем долг што не може да го вратат. Разговаравме со Пјетерѓокај и видовме можност, по што отидовме на средба со господинот Соравија во Виена. На состанокот имаше хемија меѓу нас и господинот Соравија го поздрави нашиот предлог. Разговаравме од октомври минатата година, а договорот го потпишавме на 26 мај – вели Ахмети.

Тој е дециден дека неговиот вујко нема врска со неговите бизниси и не му помогнал со ниту едно евро, но дека го почитува и дека му бил инспирација.

Четиригодишна соработка со албанскиот партнер

Пјетерѓокај вели дека со Дрин се познаваат веќе 4 години и дека тој е дел од Управниот одбор на негова фирма во Италија. На прашањето дали смета на врски во државава со оглед на тоа што станува збор за внук на лидер чија партија е дел од Владата, тој вели дека најдобар доказ за тоа дека ниту очекува, ниту имал таква помош, е неговото досегашно учество на тендери за јавни набавки во Македонија каде што иако давал подобри понуди во цена, не ги добил тендерите.

– Тука можете да прашате за корупција, но да прашате како тие фирми добиваа тендери со повисоки цени – вели Пјетерѓокај.

Тој вели дека купопродажбата на „Соравија“ е приватна зделка и дека во неа има ризик – како ќе се врати долгот од 20 милиони евра.

– Ако не успееме да ја кренеме компанијата за неколку години, и ние ќе го продаваме трговскиот центар – вели Пјетерѓокај.

Новите сопственици на „Соравија“ велат дека ќе обрнат особено внимание на енергетската ефикасност на објектот и ќе го направат поатрактивен, но не прецизираа повеќе детали за тоа што планираат со него.