И оваа влада ја губи битката со инфлацијата, а премиерот Христијан Мицкоски не е среќен со постигнатите резултати за намалување на цените. Државната статистика по којзнае кој пат го потврди она што граѓаните го чувствуваат при секое пазарување. Инфлацијата не се смирува. Во првото полугодие од годинава, во споредба со истиот лански период, таа изнесува 3,8 отсто. Но, ако се спореди јуни годинава, со истиот месец лани, порастот е 4,5 проценти.

Освен порастот на вкупната инфлација, загрижувачки е и растот на цените на храната и на безалкохолните пијалаци, како и на земјоделските производи. За само еден месец, од мај до јуни, храната просечно поскапела за 6,3 отсто. Земјоделските производи, мерени според цените на мало, пак, се повисоки за дури 11,1 проценти.
Попластично објаснето, денес кога влегувате во маркет со 1.000 денари, тие ви се доволни за 200 грама кафе, една чоколада и по некој килограм овошје или зеленчук. Поинаку и не може да биде, кога 80 отсто од производите што ги ставаме на трпезата се од увоз.

А сите се крстеа во резултатите од Законот за нефер трговски практики, па дури нè убедуваа дека со јавната објава, цените во маркетите ќе бидат подостапни. Институциите не знаат кој пат да го фатат. Ако повторно ги замрзнат цените, понудата се намалува, а со тоа се намалува и потрошувачката, што ќе рече помалку пари од ДДВ и даноци ќе се слеат во државната каса. Затоа премиерот повторно најавува дека ќе се правеле анализи за базичната инфлација, по што ќе излегле со мерки за заштита од зголемените цени на производите.

Мерките, како што рече Мицкоски, ќе биле прецизни и таргетирани и ќе ги објавеле многу скоро.
И наместо да го впери прстот кон најголемите виновници, премиерот оцени дека на растот на цените влијаела и зголемената побарувачка од граѓаните, што се должело на повисоките плати и пензии, но не најави затегнување на фискалната политика.
Да, точно е дека пензиите линеарно се зголемија за 5.000 денари, порасна и минималната и просечната плата, но разликата ја „изеде“ ланската инфлација што надмина и 20 отсто. Се трошат и повеќе пари, но поради скапотијата прашање е што добиваат за тие пари.

Секојдневно на социјалните мрежи следиме реакции поради шокантните суми на фискалните сметки по пазарувањето, а на граѓаните не им преостанува ништо друго освен да ги „титкаат“ за ситни пари очекувајќи поврат на дел од ДДВ-то.
И додека се чекаат новите анализи на пазарната инспекција, онаа претходната фаќа прав во фиоките на Министерството за економија. Па, нели од неа зависеше дали ќе има нови мерки? Во меѓувреме, граѓаните со пропагандни методи се залажуваат дека „нема драстични поскапувања“ на производите од потрошувачката кошничка. А само средствата за хигиена и детската храна скокнаа за 30 отсто, млечните производи за 15 отсто, кафето за 20, а чоколадите за 50 отсто…
Од Министерство за економија упорно повторуваат дека ги предупредиле трговците и дистрибутерите и ако анализите покажат дека се манипулира со цените на основните производи, државата ќе воведе ригорозни мерки за заштита на потрошувачите.
Во меѓувреме, незабележано помина сериозното предупредување на академик Таки Фити, кој порача дека Владата треба да делува со индиректни, а не со директни мерки, посочувајќи дека Комисијата за заштита на конкуренцијата треба да си ја врши својата работа, а не да излегува со формулации дека „не постапува освен ако немаат допрен глас“.

Институцијата со надлежност да спречува монополистичко однесување, па дури и да казнува, со игнорирањето на дивеењето на цените, практично, покажува дека не дејствува самостојно, туку по диктат на Владата.
Како и да е, отсуствуваат мерки што ќе го заштитат стандардот на граѓаните. Одговорите каде ни отишле нашите пари, ќе го дознаеме на крајот на годината, кога ќе прочитаме колкави профити оствариле големите трговски маркети, угостителите, банките. За оние што не го ни пријавуваат целиот приход и да не зборуваме!