Вкусови што се памтат: Албанска кујна -ТАВЕ КОСИ ЕЛБАСАН- Месо и ориз печени во јогурт (РЕЦЕПТ)
Албанската кујна е спој на многу традиционални рецепти богати со зеленчук и квалитетно месо. Близината на морето исто така има големо влијание врз албанската кујна и рецептите што се подготвуваат на нивен специфичен начин. Супите во националната албанска кујна заземаат почесно место, особено супите од риба. Десертите се неизбежни, а пак албанските десерти се секогаш богати со овошје.
Препорачано
Оваа недела ќе ја посветиме на албанската кујна, а ќе ја започнеме со едно јадење кое често се готви во албанските семејства, а тоа е Таве Коси Елбасан.
Таве Коси или Таве Коси Елбасан е едно од најпознатите јадења во Албанија, најмногу се подготвува со јагнешко месо, но може да се подготви и со пилешко, затоа изберете. Јадењето е навистина рустично и едноставно, но супер вкусно!
Состојки :
- 2 големи парчиња бифтек од јагнешко месо
- 5-6 лажици ориз (варен алденте)
- 500мл неутрална павлака за готвење или јогурт
- 1 лажичка рузмарин
- 2-3 лажици магдонос
- 3 јајца
- 50гр путер
- 2 лажици брашно
- 1/2 лажичка свежо мелен пипер
- 1 лажичка сол
- 1 коцка за супа (јагнешка или зеленчукова)
Подготовка:
Поделете го путерот на 3 еднакви дела.
Ставете еден дел од путерот во подлабока тава убаво да се стопи. Додадете го јагнешкото месо во тавата со путер и зачинете со малку сол и бибер. Пропржете ја секоја страна убаво по неколку мунути.
Премачкајте поголем огноотпорен сад со масло и посипете со половина од количината ориз, па додадете го месото од тавата кое треба претходно да го исечете на помали парчиња и над него додадете го остатокот од оризот. Посипете со рузмарин и магдонос.
Во маслото каде што претходно го пржевте месото додадете ја коцката супа и промешајте.
Потоа додадете го вториот дел путерот и брашното. Пржете додека брашното малку пожолти, доволно е неколку минути.
Извадете го од шпоретот и оставете да се излади и згусне околу 10 минути, а потоа измешајте ги павлаката и изматените јајца. Измешајте сè добро како би добиле убав сос.
Истурете ја оваа мешавина врз оризот и месото. И, конечно, додадете и последниот дел од путерот, но исечен на парчиња.
Печете во претходно загреана рерната на 180 C околу 40 минути.
Послужете додека е топло.
Добар апетит!
