Специјалниот претставник на САД, Стив Виткоф, и американскиот амбасадор во Израел, Мајк Хакаби, утре ќе отпатуваат во Појасот Газа за да ја проверат испораката на хуманитарна помош, соопшти денес Белата куќа.

Портпаролката Каролин Ливит информираше дека Виткоф работи на конечен план за забрзување на доставата на храна и друга помош за цивилите во Газа. Двајцата американски претставници ќе ги посетат дистрибутивните точки и ќе разговараат со локалното население за тешката хуманитарна состојба.

Посетата следува по денешната средба на Виткоф со израелскиот премиер Бенјамин Нетанјаху во Ерусалим, каде што, според израелските медиуми, главна тема била војната со Хамас и застојот во преговорите за ослободување на заложниците. Иако официјални детали од разговорот не се објавени, се очекува САД да извршат притисок врз Израел за компромис со цел напредок во преговорите.