Велика Британија изгубила 10.800 милионери во текот на минатата 2024 година, пренесува „Тајмс“. Тоа е за 157% во споредба со претходната 2023 година. Овој егзодус доаѓа откако владата на Кир Стармер ги потврди плановите за укинување на даночниот режим на земјата што не е домицилен, кој има значителни придобивки, но само за богатите поединци, пренесуваат тамошните медиуми.

За тоа што им згрешија толку лабуристите на богатите, разговараме со новинарката Жанета Скерлев, дописничка за „Слободен печат“ од Лондон.

– Се зборуваше уште за време на изборите дека ова ќе се случи, Поточно, главно богатите најавуваа: „Ако победат лабуристите, ние ќе си одиме“. И сега многумина се прашуваа, па што толку им згрешиле лабуристите на богатите?! Веднаш дојдовме до одговорот, а тоа е дека нема веќе избегнување на плаќање даноци. Многумина имаат фондови надвор од земјата во таканаречените „даночни раеви“, каде што, не знам, на разни острови, дали биле Девствените Острови или не биле Девствените, меѓутоа таму имат свои фирми, офшор компании. И го користат тоа кога водат некаков бизнис или кога купуваат нешто не плаќаат данок. Сега лабуристите решија посериозно да се позанимаваат со таа тема и веќе најавија дека нема простување – вели Скерлев.

За разлика од порано, кога во случај на даночен прекршок имало опомена, денес има казни.

– Благодарение на акцијата на лабуристичката влада и благодарение на  таканаречените свиркачи кои одвреме-навреме ќе обелоденат некакви документи како Панама документите, дознавме дека и нашиот поранешен премиер Тони Блер избегнал плаќање данок од 312.000 фунти во државата. Иронијата е дотолку поголема што кога Тони Блер престана да биде премиер, и тој и други како него, како на пример Борис Џонсон, почнаа да држат говори низ светот, вклучувајќи ја и Македонија, и дебело да наплаќаат по 800-900 илјади фунти – вели Скерлев.