Изворот на бездомни кучиња коишто живеат во Македонија не е неодговорното сопствеништво, вели за „Слободен печат“ Илија Петковски, основач на Асоцијацијата на стилисти за миленици и стилист за миленици, туку кучињата што живеат на депонии, кучињата што живеат во планини како диви кучиња и селските кучиња без сопственик. Потребна е комплетна контрола и следење на овие групи на кучиња и тоа со широка стратегија составена од биолози, еколози, ветеринарни доктори, за да се сфати како овие групации мигрираат и еволуираат.

Петковски, кој 20 години живеел во Франција, вели дека таму прекумерниот број на бездомни кучиња во градот се контролира со отстрел, исто како што се реагирало и во Југославија. Според него, ова е можеби крајното решение, но државата законски може да реагира.

– Преку соодветното стручно испитување и следење треба да се дојде до сознание кој е потенцијалот на една популација, колку може да издржи и од кој момент треба да се применат мерки кои се законски и државата може да си ги дозволи, како и за контролата за сите други диви животни, мора да ја контролира таа популација за да не се преплави и да дојде во градот. Денес под името на заштитата правиме голема грешка помеѓу миленикот куче и кучето што не е миленик, туку е диво куче – вели Петковски.

За споредба, нагласува тој, во Франција законски е забрането да им се дава храна на гулабите, на тој начин ја спречуваат нивната масовна репродукција. Од друга страна, бројот на кучиња без сопственик кај нас расте. Според него, една од причините за овој горлив проблем е тоа што дозволуваме да се прават нишки на кучиња.

– Во една зграда им даваат храна на кучињата кои се движат тука, во друга зграда друг на друго куче му ги дава остатоците од домашната трпеза, на трета локација трети луѓе хранат друго куче и на тој начин се прават повеќе нишки низ градот. Луѓето тоа го прават од емпатија, од жал, но не се свесни дека на тој начин не го спречуваат проблемот, напротив – вели Петковски.

Овој горлив проблем пројавува низа други големи проблеми.

– Секој ден читаме за нападнат човек од куче, дури имаше и миленици задавени од глутници на бездомни кучиња. Се работи за огромен проблем и јас велам, веќе се движиме кон Истанбул, тие што ја следат проблематиката знаат за што зборувам. Затоа, да не бидам сфатен погрешно, пред да бидат донесени радикални решенија, можеби може да се антиципираат постапките – рече нашиот соговорник.

Кастрацијата и стерилизацијата се важни за благосостојбата на животното, но ова низ годините не се покажа како клучно за решевање на проблемот со бездомни кучиња, поентира тој. Според Петковски, извозот на уличните кучиња од државава не само што е погрешна мерка, туку треба да се забрани.

– Конкретно со оваа мерка оставена е портата на девијации, бидејќи немаме следење на кучето од точка А, односно градот Скопје како негов сопственик, кој плаќа многу пари доколку ве гризне куче. Меѓутоа, кога се извезува некое куче, општините и градот добиваат нула денари. Се поставува прашањето како можеме да извезуваме нешто што е наше, а да не добиваме никакви средства за тоа, а уште поважно од парите е ,каде завршуваат тие кучиња? Дали завршуваат во лаборатории? Дали се евтаназирани при самиот влез во таа држава затоа што носат заразна болест забранета во таа држава? Секако дека има и такви кои завршуваат во некое среќно семејство, но постојат многу примери за тоа дека кучињата не го добиваат тој „american dream“ којшто ни се продава – вели Петковски.

Целиот разговор потгледнете го во продолжение на видеото: