Македонка Димитрова е универзитетски професор, но и голем активист за развој на претприемништвото, особено женското, како и основач на Институтот за одржливост ЕКОС. Годинава таа го доби признанието „Жена лавица“ од Здружението на жени менаџерки „Елит“. За тоа дали во денешно време сè уште треба да го делиме претприемништвото на женско и на машко, и каква е позицијата на жените во општеството, разговараме во емисијата „Слободен печат“.

– Титулата „Жена лавица“ се доделува по четврти пат, и годинава за првпат беа номинирани не само жени што членуваат во Здружението „Елит“, туку и други жени што во изминатата година излегле од својот комфор и направиле многу не само на работното место, туку и во однос на филантропијата, поттикнување на економскиот развој, унапредување на позицијата на жената, како во Македонија, така и во пошироки рамки во регионот. Беа номинирани 11 жени од банкарскиот сектор, од образованието, невладиниот сектор, производни индустрии, меѓутоа среќна сум што мене ми припадна признанието – вели Димитрова.

Таа смета дека меѓу машкото и женското претприемништво нема некакви разлики.

– Претприемачките намери се формираат врз основа на образованието, какви се искуствата доколку имало семеен бизнис, искуството од родителите и самото опкружување. Во светски рамки, десетта година сум учесник на едно големо глобално истражување за студентски претприемачки намери. Го водат колеги од Централата од Швајцарија, се реализира на секои две години, а Македонија е дел од тие 60-ина земји во кои се спроведува во континуитет. Во изминатата декада нема разлики меѓу машко и женско претприемништво. Но, кога станува збор за позицијата на жените и на мажите во една организација, сè уште постои таква сегрегација, мажите на иста позиција добиваат повисока плата, жените пониска – вели Димитрова.

Сепак, таа очекува дека таквата практика за таканаречената Зет генерација, или Алфа генерација, којашто доаѓа на пазарот на труд, ќе се менува.

– Тие нема да бидат толку флексибилни и ќе се борат за своите права, додека не ги добијат, а ако не, ќе ја напуштат организацијата. Мислам дека организациите тоа треба да го препознаат и да си го сменат начинот на кој функционираат – вели Димитрова.

Во однос на неповолниот сооднос меѓу жените и мажите во застапеноста на раководни функции, Димитрова вели дека тој проблем во Европската Унија се решава со квоти – да мора да има одредено присуство на жени менаџери во организацијата.

– Колку и да е тоа непопуларна мерка, потоа кога ќе се направи некоја структура во организацијата, таа ќе продолжи да функционира – вели Димитрова.

Димитрова нагласува дека работната позиција е само еден сегмент од целокупната слика за жената во општеството и дека треба да се работи на многу полиња. Во нашето општество кое е традиционално, особено треба да се подигне свеста на жените во руралните средини каде што сè уште имотот му се остава на машкото дете.

– Кога ќе постигнеме финансиска независност кај жените без разлика во кој сектор, во која област на општеството, дури тогаш ќе можеме да зборуваме за општество што ќе се развива на рамноправна основа. И мора ова да го постигнеме, затоа што младите нема да ни простат. Ако не обезбедиме фер средина за развој, за учење, за напредување во професијата, за доживотно учење, тие ќе се заменат на друго место, каде што тие опции ќе им бидат системски гарантирани – заклучува Димитрова.

Целото ВИДЕОИНТЕРВЈУ погледајте го погоре.