Во судството нешто не е во ред штом Обвинителството и Судот преку соопштенија се обидоа да ги толкуваат состојбите и случката што се случила во контролата на летање, и судот и обивнителството во овој случај не покажаа дека се на висина на задачата што ја имаат согласно Устав, порача политичкиот аналитичар Ѓунер Исмаил во студиото на „Слободен печат“.

Исмаил смета дека на секој граѓанин му било јасно дека таму во кулата на контролата за летање во еден момент имало осум луѓе кои по никоја основа не би требало да бидат таму.

„Прашањата што сите си ги поставуваме е како на тие луѓе им паднало на памет да одат таму? Кој ги викнал? Кој ги поканил? Кој ги излажал? Како влегле во место кое не е како секое друго каде може да одите кај некого на посета и да пиете кафе. Сите процедури во таа ќе речам куќа, биле прекршени или не постоеле во тој момент. Се надевам дека новата управа со помош на Еурконтрол и институциите, ќе ги обнови стандардите според кои таа институција треба да функционира и да го регулира сообраќајот на нашето небо“, посочи тој.

Исмаил истакна дека скандалот во М-НАВ е дотолку поголем што Македонија е земја членка на НАТО, а македонското небо го користат и авијации на земји членки на Алијансата.

„Потсетувам дека ние сме членка на НАТО и нашето небо е под заштита на НАТО, односно на НАТО држави. Ние немаме сопствена воена авијација и нашето небо во еден дел го штити грчкото воено воздухопловство, се приклучува италијанското и така натака и затоа во еден момент се кренала голема паника, па амбасадори на земји членки на НАТО се јавувале кај претседателот на државата“, заклучи Исмаил.

Целото интервју со Ѓунер Исмаил следете го во продолжение: