„Насмевка“ е новата песна зад која како автор се потпишува еминентниот музичар Игор Атанасоски-Гуру Харе. Се работи за песна во која се појавуваат десет звучни имиња од музичката естрада: Игор Џамбазов, Пере Нокаут, Сара Мејс, Дани Димитровска, Антонија Гиговска, Влатко Лозано, Тамара Тодевска, Мијата, Андријана Јаневска и Стефан од Некстајм.

Песната е направена по повод Меѓународниот ден на семејството, 15 мај, кој во Македонија на еден посебен, уникатен начин ќе се одбележи за првпат во организација на СОС Детско село.
За тоа како се реализирал овој проект и на кој начин е планирано да биде организиран утрешниот ден кај нас, разговараме со нашите гости Кристина Кипријановска-координатор за бренд и комуникации во СОС Детско село и музичарот Игор Атанасоски-Гуру Харе.

– Во пресрет на 25-годишнината од постоењето на СОС Детско село, што се навршува идната 2026 година, одлучивме да направиме нешто значајно и важно за нашето општество. Проценивме дека Интернационалниот ден на семсјтвото, 15 мај е одличен датум да се покаже важноста на семејството. Место кое е најважно за растот и развојот на едно дете. Затоа сакаме на овој ден сите медиуми да зрачат во тој импулс. За првпат организираме настан „Мedia takeover day“ или медиумски ден посветен на семејството, љубовта, грижата и насмевките. Песната „Насмевка“ која е со хуманитарен карактер, ја направивме како една силна порака којашто се надеваме дека ќе допре до сечие срце – вели за „Слободен печат“ Кипријановска.

Голем е бројот на деца во социјален ризик во Македонија, како што вели Кипријановска, последните статистички податоци се загрижувачки и тоа мора да се промени.

– Заклучно со 2023 година повеќе од 7.700 деца се во социјален ризик во државава. Повеќе од 1000 деца се со статус на лица без родителска грижа, повеќе од 3.900 деца живеат во заедница каде што постојат семејни или брачни предизвици, а повеќе од 2.700 деца се во друг социјален ризик. И ова не се само бројки, ова се детски срца кои бараат помош и поддршка – нагласува таа.

За тоа како се создавала песната, Гуру Харе раскажува дека пејачите сите до еден без проблем ја прифатиле поканата да бидат дел од „Насмевка“.

– Имав само десет строфи, иако мислам дека фалат уште многу пејачи тука. Морам да признаам дека не беше ни малку лесно да се спојат на едно место овие луѓе, но не во поглед на убедување, сите со еден збор прифатија, туку во поглед на приватните ангажмани и усогласувањето. Ќе видите и во спотот колку убаво се дружевме и колку убаво си поминавме сите – вели тој.

Гуру Харе песната ја напишал на многу интересен начин.

– Специфичен е моментот на инспирација кој го добив за оваа песна. Пред десетина години на „Браќа Манаки“ ја сретнав шпанската актерка Викторија Абрил, која тогаш ме праша: Дали знаеш кој е најбрзиот начин на комуникација помеѓу луѓето? Јас ја гледав зачудено, а таа ми одговори: „Насмевката“. Така инспирацијата за оваа песна датира од овој момент – вели тој.

„Слободен печат“ се приклучува кон оваа хуманитарна кампања и песната премиерно ќе ја објавиме како и останатите медиуми во текот на утрешниот ден. Останете нестрпливи до утре!