ВИДЕОИНТЕРВЈУ| Дарко Саздов, МАПАС: Само половина пензија ќе примаат оние што ќе ги надживеат парите од Вториот столб
Програмирањето на пензиите од Вториот столб се прави на 10, или на 20 години. Но и во меѓувреме, парите на личната сметка се оплодуваат. Сепак, сметката се празни. Ако осигуреникот го надживее износот во Вториот фонд, пензија ќе добива само од државниот Фонд на ПИОМ
И по дваесетина години откако функционира Вториот пензиски столб, дури и неговите членови имаат многу отворени прашања. Парите во Вториот столб се водат на лична сметка и тие се наследни во случај на смрт. Но, осигурениците може да го надживеат износот, па да бидат оставени само на делот од пензијата што ја добиваат од државниот фонд за ПИОМ.
Овие детали ги открива Дарко Саздов, член на Советот на експерти на Агенцијата за супервизија на капитално пензинско осигурување (МАПАС), кој беше гостин во студиото на „Слободен печат“.
Препорачано
– Вообичаено пресметката за влечење пари од Вториот столб е на 20 години, но секоја година се прави повторна проекција на износите. Тие средства во меѓувреме се инвестираат, финансиските пазари можат да ги оплодат дополнително. Сепак, постепено, износот се празни. За разлика од Првиот столб, каде што пензијата е дефинитивна, во Втриот столб зависи од уплатите. Колку порано сте влегле во системот, толку подобро. Така, вашата индивидуална сметка, во одредени ситуации, може да овозможи и многу повисока пензија од Вториот столб во однос на Првиот столб. Во капитално финансирано осигурување, просечна возраст е некаде 37 до 40 години – вели Саздов.
Тој посочува и дека МАПАС има некои законски предлози со цел овие средства да се зголемат.
– Од пензискиот придонес кој е 18,8 проценти на бруто плата, 12,9 проценти одат во првиот столб, а само 6 проценти одат во вториот столб, а од таму треба да се исплати половина пензија! – појаснува Саздов.
Саздов открива и дека барањето за пензија од Вториот столб може да се одложи до 67 години.
– Тоа значи дека условот за 62 и 64 години е можност, но секој член во Вториот столб може да го одложи своето барање за пензија до 67-годишна возраст. Тоа е една доброволна основа, членот треба да следи како се развиваат одредени финансиски ситуации и може да одлучи да го одложи периодот. Во меувреме ќе зема пензија само од Првиот столб. Кога ќе одлучи дека сака да ги земе и тие средства, ќе се обрати до пензиското друштво каде што прават проекција. Пензиското друштво каде што е член, го добива барањето и има обврска да се обрати кај другите две пензиски друштва кои работат во системот, и од сите три да добијат понуда за износот – вели Саздов и објаснува дека идејата е парите во Вториот столб подолго да стојат и да се инвестираат, па тој дел од пензијата да биде поголем.
Целото ВИДЕОИНТЕРВЈУ погледајте го погоре.
