Која е улогата на анестезиологот при оперативен зафат? Колку останува заедно со пациентот? Дали пациентот пред и постоперативно е грижа на анестезиологот? Одговори на овие и на многу други прашања во емисијата „Слободен печат“ побаравме од доктор Бети Костадиновска-Јорданоска од приватната болница „Аџибадем Систина“.

Докторката е анестезиолог на одделот кардиохирургија и нејзината улога е многу битна во тимот којшто се состои од кардиохирурзи, анестезиолози, кардиолози, медицински персонал, сестри, анестетичари, инструментарки и помошен персонал.

– Ние сме невидливи херои, луѓе кои кога пациент ќе дојде во болница претставуваме водич за самиот пациент со една голема грижа и посветеност од моментот на прием, односно предоперативна подготовка на пациентот, па сè до неговото комплетно закрепнување, односно доведување во степен да може нормално да се оди дома. Кога ќе дојде пациентот и го примаме на нашиот оддел, она што ние како анестезиолози го правиме е преданестезиолошката визита на пациентот, се запознаваме со медицинската историја, се прават иследувања, предоперативно се проверуваат лабораториските анализи, ги сумираме сите анализи, резултати, да направиме соодветен план за тоа каков тип на анестезија би примениле кај одреден пациент – вели Јорданоска.

Таа објаснува дека секоја анестезија не е за секој пациент. Вели дека е многу битна преданестезиолошката визита на пациентот, каде што се добиваат податоци за целокупната здравствена состојба на пациентот.

– Од неа се гледа кои лекови треба да ги прекинеме пред самата операција, кои лекови ги даваме на денот на операцијата. Она што е многу битно предоперативно, правиме психолошки разговор со самиот пациент. Тој има многу грижи, страв, каков ќе биде самиот чин, што ќе се случи, каква ќе биде операцијата. Ние постојано работиме со индивидуализиран план за секој пациент. Зависно од тоа, одлучуваме кој тип на кардиохируршка операција ќе се работи, дали ќе биде комплексна – вели Јорданоска.

Таа објаснува дека анестезиолозите постојано се присутни во оперативната сала и ги следат виталните функции.

– Многу е битно, како анестезиолози постојано да ги следиме овие параметри заради тоа што пациентот треба да биде заспан, релаксиран, обезболен. Пациентот не треба во тек на операција да се разбуди, не треба да чувствува болка – вели докторката.

Докторката вели дека да се биде кардиоанестезиологот е сосем поразлично во однос на другите анестезиолози затоа што кардиохируршките операции се едни од најкомплексните операции, бидејќи треба да се обезбеди мирно, бескрвно срце коешто не чука. За тоа се користи посебна машина.

– Таа машина е белите дробови и срцето на пациентот додека му се овозможува на кардиохирургот да работи нормално, да се изведе сè во најдобар ред. Анестезијата воопшто не е лесна работа. Ризиците почнуваат уште со самиот прием на пациентот, можна алергија на одредени лекови, после тоа проблем со дишните патишта, но и многу други проблеми кои можат да се јават во текот на операцијата – вели Јорданоска. Според неа предоперативно се прави план, за да може сите евентуални проблеми навремено да се решат.

Но анестезиологот е присутен и по операцијата. Пациентот постепено се буди. Практично присуството на анестезиологот е сè до неговото заминување дома.